Nga Blendi Gashi
Hoxha Xhevat Kryeziu nga fshati Bubavec i komunës së Malishevës, i njohur në mbarë Dukagjinin dhe jo vetëm si Mulla Xhevati, thotë se rinia kosovare duhet me e dashtë Zotin e Madhërishëm, dhe duhet të largohet nga dukuritë negative që po e dëmtojnë të ardhmen.
Mulla Xhevati, në një intervistë dhënë për tesheshi.com me rastin e Fiter Bajramit, ka një mesazh për të gjithë ata persona që me qëllim synojnë degradimin e islamit, si dhe një mesazh për politikanët kosovarë.
Si ja kaluat këtë Ramazan? I sati është në jetën tënde? Pra, prej kur keni nisur të agjëroni?
Muaji i madhnueshëm i Ramazanit për 30 ditë ishte mysafir i familjeve tona. Kemi kaluar jashtëzakonisht mirë. Edhe unë, si shumë moshatar të mij, në moshën 13-vjeçare kam filluar të agjëroj bashkë me familjen time, që i bije qe 47 Ramazana që i kam agjëruar.
Cili ka qenë Ramazani ma i vështirë e ma i kandshëm që mbani mend?
Ramazani më i vështirë gjatë jetës sime ka qenë ai që kam përjetuar gjatë luftës. E më i lehti ishte ai që e perjetova pas luftës (pas çlirimit).
A po largohet apo po i afrohet rinia kosovare xhamisë?
Rinia kosovare po afrohet me një ritëm të lehtë rrugës të së ardhmës shpirtërore ku jeta, mirëqenia, humanizmi, solidaritet janë atribute të Krijuesit të gjithësisë, Zotit të Madhërishëm. Pra me një fjalë, rinia jonë gjithmonë po shkon drejt Islamit si fe hyjnore.
Çka po doni me i thanë rinisë në këtë ditë?
Rinia kosovare mbi të gjitha duhet me e dashtë Zotin e Madhërishëm, familjen e tij, dhe mbi të gjitha le të mbretërojë dashuria mbi kombin dhe atdheun tonë ku kemi lindë e ku po jetojmë.
Pra rina duhet të largohet nga dukuritë negative që po e dëmtojnë të ardhmen e shtetit tonë.
Cila duhet të jetë figura e hoxhës në shoqëri, a veç të shikoj punët e xhamisë, apo dhe me qenë kontributor real, e jo veç me llafe, në rregullimin e punëve?
Kontributi i disa hoxhallarëve është i madh dhe do të jetë akoma më i madh vetëm atëherë kur hoxha e kupton misionin e tij fisnik human, shpirtëror e njerëzor. Se hoxha duhet të jetë vet shembull i moralit të lartë, i etikës profesionale, dhe t’i mbetet besnik fjalës së shkruar të Zotit, pra kushtetutës hynore, Kur’anit famëlart.
Do njerëz jashtë fesë e besimit, po duan me i nda muslimanët, në ata që ndjekin islamin tradicional e në ata që janë arabizu, sipas gjykimit të tyre. Ç’ka është kjo mesele sipas jush?
Çdo tentativë, nga çdo kushdo që vjen, me qëllim të degradimit të Islamit, i cili sjellë përçarje, tmerr e gjakderdhje tek njerëzit në përgjithësi nuk është gjë tjetër, ai veç se një djall i mallkuar e që do të përfundojnë në vendin e tyre të ferrit aty përgjithmonë.
Çka po iu dhemb më shumë ju si hoxhë në këto kohë që po jetojmë?
Mosharmonia dhe përçarjet mes nesh si shoqëri shqiptare.
Keni marrë pjesë në pajtim të shumë familjeve në hasmëri. Ç’mesazh u jepni atyre dhe cilat familje i pajtuat së fundmi ?
Padyshim lëvizja e pajtimit të gjaqeve ishte një lëvizje kombëtare humane e cila ka bërë shumë punë dhe po bën akoma. Me datë 1 korrik të këtij vitit pajtova familjen Morina nga Klina dhe familjen Elshani nga Drenica.
Për fund një pyetje për politikën në vend. Cili është mesazhi juaj si hoxhë për politikanët kosovarë?
E lus Zotin e Madhërishëm që elitës tonë politike t’ia shtoj unitetin, tolerancën dhe mirëkuptimin në mes vete që bashkarisht t’i realizojnë aspiratat e popullit tonë për fuqizimin e shtetit të Kosovës. /tesheshi.com/
