Kleriku më i lartë në Arabinë Saudite, Muftiu i madh tha se incidenti i së enjtes në Mekë, ku humbën jetën më shumë se 700 pelegrinë, ishte përtej kontrollit njerëzor.
Ai i tha ministrit të Brendshëm të vendit, princit të kurorës, Mohammed bin Nayef, se nuk ishte ai fajtori për tragjedinë. Irani dhe disa shtete të tjera kanë fajësuar autoritetet saudite për incidentin, duke thënë se nuk ka pasur masa të mjaftueshme sigurie.
Incidenti është më i rëndi që ka goditur pelegrinazhin e përvitshëm të Haxhit në Mekë, në 25 vitet e fundit. Mbreti saudit Salman, ka urdhërua rishikimin e masave të sigurisë pas incidentit.
Pelegrinazhi tashmë ka hyrë në fazën finale e nuk janë raportuar incidente të tjera serioze.
Ndërkaq, Muftiu i madh, Sheikh Abdul Aziz bin-Abdullah al-Sheikh priti princin e kurorës që është edhe zëvendëskryeministër dhe shef i komitetit suprem të Haxhit. “Ju nuk jeni përgjegjës për atë që ndodhi”, i tha ai princit.
“Për gjërat që njerëzit nuk mund t’i kontrollojnë, ju nuk mund të fajësoheni. Fati dhe paracaktimi janë të paevitueshëm”, tha ai
Incidenti ndodhi mëngjesin e së enjtes ndërsa 2 milionë pelegrinë marrin pjesë në ritin e fundit e më të rëndësishëm të haxhit. Pelegrinët hedhin gurë në shtyllat Jamarat, që qëndrojnë në vendin ku djalli tentoi të korruptojë profetin Ibrahim.
Incidenti ndodhi kur dy radhët e dendura të pelegrinëve u bashkuan me njëra-tjetrën në një sektor rruge në afërsi të urës Jamarat në Mina, në luginën që ndodhet 5 kilometër larg Mekës. /tesheshi.com/
