Nga Ermir Hoxha
Në betejën e fortë që ka nisur dhe që parashikohej, atë për kreun e FSHF-së mes Armando Dukës dhe Bashkim Finos, kanë filluar të nxirren “skeletet e vjetra nga dollapët”.
Ishte Armand Shkullaku, një gazetar i njohur dhe pjesë e kupolës Klan, me “lidhje të shkurtëra” me Dukën, në kuptimin e influencës së interesave, që mbrëmë në Opinion-in e Fevziut përmendi rimimin e famshëm të Fatos Nanos në KPD, “Muçi, Naçi, Baçi”, ku i fundit ishte Bashkim Fino.
Këtë, Shkullaku ia përmendi një prej të ftuarve me qëndrim anti-Duka, si për t’i thënë se dhe Fino që ai mbronte si kandidaturë, për më tepër me argumentin e të papërlyerit a të papërfolurit ndonjëherë për afera korruptive, kishte qenë dikur gjithsesi i shënjestruar për to, nga Nano pra, me futjen në treshen e atyre që ish-kreu socialist i shikonte si birbot e parasë në krahun Meta.
Por si ndodhi kjo dhe a e meritonte vërtet Fino një xanxë të tillë?
Realisht ajo është hera e parë që Bashim Fino sulmohej politikisht, duke tentuar të njolloset.
Ishte viti 2002, kur Fino, ministër i Punëve Publike, ishte bashkuar me Ilir Metën, në luftën e brendshme në PS, duke votuar kundër shokut të vjetër të shkollës, Arben Malaj, i cili ishte kandidat i Nanos për kryeministër. Dhe kryetari i atëhershëm të PS-së nuk ja fali ish-mikut të tij.
Ndërsa Mustafa Muçin dhe Anastas Angjelin, Fatos Nano e akuzoi për afera korruptive në dikasterët që drejtonin, Bashkim Finon e goditi pse frekuentonte një ambient të njohur në Tiranë, ku sot është TEG-u dhe që pronar kishte një emër të famshëm të botës së krimit.
“Ç’punë ke ti me Mirin e Xhikes. Ai nuk është shoku yt”?
Kjo ishte pyetja retorike e Nanos, e cila bëri efekt të fortë në opinionin publik në atë kohë. Fino u përgjigj se shokët e tij të vetëm janë Fatos Nano, Arben Malaj dhe Ilir Meta, e shtoi se ai po sulmohej vetëm se përkrahu Ilir Metën si kryeministër.
Pas KPD-së, Fino por edhe qeveria e Ilir Metës ranë për të sjellë Fatos Nanon-kryeministër.
Ndërsa Ilir Meta u largua nga PS-ja duke themeluar LSI-në si rival me ish-partinë e tij, Bashkim Fino u afrua sërish me Fatos Nanon, i cili në vitin 2004 e promovoi duke e emëruar ministër të Rregullimit të Territorit dhe Turizmit dhe duke i konfirmuar kandidaturën në zonën e sigurt të Kuçovës, në zgjedhjet e 3 korrikut 2005.
Vetëm rasti i KPD-së ka qenë përfshirja e vetme e Finos në luftën e brendshme e PS-së, dhe kjo ngaqë duket Fatos Nano u hatërmbet keqazi prej mbështetjes që miku i tij i dha armikut Ilir Meta.
Nga ana tjetër, nga opozita nuk ka pasur asnjëherë akuza publike ndaj Bashkim Finos për abuzim apo keqpërdorim të pushtetit. Të paktën nuk janë artikuluar ndonjëherë.
Në garën e fortë për FSHF-në, padyshim përplasja do të vijë duke u egërsuar në tone dhe metoda, por dhe në këtë rast nuk ka pse mos këtë fair play. /tesheshi.com/
