Banorët e një fshati në Venezuelë kanë gjetur bizhuteri dhe sende ari të hedhura nga deti në një plazh lokal për disa muaj.
Midis tyre është peshkatari 25-vjeçar Yolman Lares, i cili zbuloi i pari, thotë ai, “prodhimet” e detit.
“Ishte hera e parë që diçka kaq e veçantë më kishte ndodhur, unë fillova të dridhesha dhe të qaja nga gëzimi,” tha ai për New York Times, duke rrëfyer momentin kur gjeti një medalion prej ari me imazhin e Virgjëreshës Mari.
Lajmi u përhap shpejt, kështu që banorët e tjerë të fshatit të vogël të peshkimit Guaca nxituan në plazh. Shumë ishin me fat që gjetën bizhuteri, kryesisht unaza ari që më pas do t’i shisnin për të blerë ushqim.
Qindra unaza ari dhe argjendi, medalione dhe madje copa ari janë gjetur deri më tani, gjë që u ka sjellë gëzim të madh fshatarëve që po luftojnë me krizën e shkaktuar nga pandemia e koronavirusit.
Analizat laboratorike kanë treguar se bizhuteritë nuk janë më e vjetra se 70 vjet. Origjina e tyre nuk dihet, por vendasit besojnë se piratët ose marinarët që mungojnë prej kohësh kanë diçka të bëjnë me to. /tesheshi.com/
