Fundi i përballjes mes Manchester United dhe Manchester City, ka shpërthyer të gjithë tensionin që ka patur ndeshja. “Shkrepsja” që ka ndezur situatën në dhomat e zhveshjes ka qenë trajneri i United, Jose Mourinho, i cili ndërsa kalonte, u ka thënë lojtarëve të City-t të mos e egzagjeronin me festimet.
Por lojtarët kundërshtarë, natyrisht kanë bërë të kundërtën dhe kanë shtuar të bërtiturat ekzaltuese. Aty Mourinho i është afruar portierit të City-t, Ederson, i cili gjatë ndeshjes bëri të paktën 2 pritje mrekulli, duke e ofenduar. Aq është dashur që situata të acarohej, me The Special One që “u la” në qumësht nga kutitë që i fluturuan në trup.
Në sherr janë përfshirë të gjithë, me Lukakun që “i iku truri”, me Artetën, ndihmësin e Guardiolës që u ça në kokë, e shishe uji që u hodhën nga çdo drejtim, e me përpjekjet e Kompany e Herrera, për të shuar gjakrat e ndezur.
Vetëm pas njëfarë kohe gjithçka është qetësuar, edhe pse dhomat e zhveshjes dukeshin si sheshe pas ndonjë mitingu. Në këtë mënyrë u mbyll derbi i Manchesterit, ndeshja që e bëri skuadrën e Guardiolës të largohet 11 pikë nga United, çka nënkupton, sërish “huq” për portugezin “e grindur”. /tesheshi.com/
