Jose Mourinho ka shpërthyer në konferencën e zakonshme për shtyp para sfidës së parë që Chelsea e zhvillon këtë edicion në ligën e Kampionëve. Kur u pyet lidhur me rënien e rendimentit të skuadrave që ai drejton në edicionin e tretë, ai iu rikthyer historikut por pa harruar të sulmojë gazetarin që kishte parashtruar pyetjen:
“Duhet të konsultoheni me google-in para se të bëni pyetje budallaqe”, theksoi Mourinho.
Skuadra e tij Chelsea, e ka filluar në mënyrën më të keqe të mundshme sezonin për mbrojtjen e titullit në Premier Ligë, duke regjistruar bilanc negativ në pesë ndeshjet e para. Vetëm katër pikë nga 15 të mundshme janë pak për një skuadër që për objektiv ka titullin e kampionit.
Ky është starti më i keq i londinezëve në 29 vitet e fundit dhe për këtë portugezi ka marrë kritika të ashpra kohëve të fundit. Por, në fakt, ai mendon se me skuadrën e vet po ndodh e kundërta:
“Është me të vërtetë e tmerrshme që njerëzit dëshirojnë të gjejnë probleme në skuadrën time, megjithëse ato nuk ekzistojnë”, përfundoi i vetëquajtuari “i veçanti”. /tesheshi.com/
