Jose Mourinho nuk beson se kombëtarja italiane mund të mbrojë titullin e kampionit të Evropës në turneun që nis të premten në Gjermani. Në Euron e fundit, Italia mposhti në gjysmëfinale Spanjën, në finale Anglinë, por trajneri i njohur mendon se një gjë e tillë nuk mund të ndodhë më.
Italia është pjesë e Grupit B, ku do të luajë kundër Shqipërisë, Spanjës dhe Kroacisë. Se deri ku do të shkojnë, mbetet për t’u parë, por nëse do të pyetet Mourinho, Italia nuk mund të shpresojë të përsërisë rezultatet e katër viteve më parë.
“Jo, nuk e besoj këtë. Italia nuk ka një ekip të talentuar dhe nuk mendoj se mund të përsërisë rezultatin e Euros së kaluar. Për mua, favoritët janë ato skuadra që janë favorite edhe për të tjerët. Ata janë Portugalia, Anglia, Franca dhe më pas Gjermania dhe Spanja”, tha Mourinho.
Italia luan kundër Shqipërisë të shtunën dhe me Spanjën pesë ditë më pas. Në xhiron e fundit të fazës së grupeve kundërshtare e saj do të jetë Kroacia, shkruan SC Sport. /tesheshi.com/
