Mançester Junajtedi kaloi mbrëmë në çerekfinale të Ligës së Europës pasi eliminoi Rostovin, në një përpjekje për t’u kthyer te ditët e tij më të mira, që morën fund me largimin e Alex Ferguson-it.
Pas dështimeve të njëpasnjëshme, tani ekipi anglez është në dorë të portugezit Mourinho, që në vitin e parë të tij ia ka dalë të fitojë një trofe. Mançester Junajtedi mposhti 3-2 Sauthemptonin më 26 shkurt, duke fituar Kupën e Ligës.
Në kampionat, “djajtë e kuq” renditen të gjashtët, të dorëzuar përsëri në luftën për titull, pas tre sezonesh të përfunduara në të njëjtat ujëra.
Mourinho tregohet realist kur deklaron se Mançester Junajtedi nuk është ende gati të bëhet forcë dominuese në futbollin anglez.
“Nuk jemi gati për të qenë një forcë dominuese. Nuk jemi gati për t’u përpjekur për të fituar gjithçka. Për shkak të natyrës së klubit, dhe të vetes sime, jemi gati të luftojmë për çdo ndeshje, për çdo pikë,” i tha Mourinho BBC-së.
“Ka një hapësirë mes ambicies së përgjithshme të një klubi të tillë gjigand dhe asaj që jemi në realitet.” /tesheshi.com/
