Jose Mourinho përgënjeshtron thuajse të gjitha mediat në Angli dhe konfirmon se do të qëndrojë tek Manchester United. Edhe pse mediat më prestigjoze e dhanë të sigurtë dorëheqjen e tij, pas prishjes së mardhënieve me klubin, vetë portugezi e ka hedhur poshtë këtë lajm.
“Unë jam në mes të kontratës dhe i qëndroj asaj deri në fund, se jam njeri i besës. Drejtuesit e Manchester janë të kënaqur nga puna ime dhe mardhënia jonë mund të shkojë edhe përtej kontratës. Do të qëndroj në Manchester, nuk iki. Mbase nuk jam aq i disponueshëm për ju në ccdo moment, por kjo nuk ju jep të drejtë të aludoni për mua” – u është drejtuar trajneri i “Djajve të kuq” gazetarëve.
Sipas “skenarit” të gazetave britanike, Mourinho kishte filluar “grricjet” me pronarët e klubit, pasi në derën e tij kanë trokitur përfaqësues të klubit të PSG.
Natyrisht, kampionati thuajse i humbur, për shkak të 15 pikëve diferencë që kanë krijuar rivalët e Manchester City, polemikat me një ikonë të klubit si Paul Scholes, si edhe afro 300 milion euro të shpenzuara në merkato, u renditën nga mediat si shkaqe të mjaftueshme që portugezi të largohej nga Manchester. /tesheshi.com/
