Ish-trajneri i Çelsit, portuguezi Mourinho, po pëlqen të trajtohet tani si “i duruari”, e jo si “speciali”. Pa ekip prej muajsh, qysh kur e la drejtimin e Çelsit, Mourinho nuk dëshiron të nxitohet për të nisur një aventurë të re.
Të njëjtën gjë ka deklaruar dhe gjatë një udhëtimi në Singapor, ku as e ka mohuar e as e ka pohuar një kalim për te anglezët e Mançester Junajtedit, duke treguar se parapëlqen të qëndrojë dhe për pak kohë pushim.
“E ndiej gjithmonë se është më mirë të presësh, të mos nxitosh, të jesh i qetë, të presësh për lëvizjen e duhur. Mendoj se nisja e sezonit tjetër me një klub të ri dhe me një kontratë të re është gjëja më e mirë që duhet bërë,” u ka thënë ai gazetarëve të interesuar.
Thashetheme i ka quajtur zërat se është punë e mbaruar marrja e drejtimit të Mançester Junajtedit prej tij: “Lexoj aq gjëra të ndryshme. Një ditë thuhet se po shkoj në Kinë, një ditë tjetër se po shkoj në Itali, e njerëzit thonë se po kthehem te Interi.”
“Realiteti është se nuk kam një punë, e për momentin jam i lumtur që nuk kam një punë,” ka përfunduar Mourinho, duke e lënë të hapur çdo mundësi për të ardhmen e karrierës së tij. /tesheshi.com/
