Në Çmimin e Madh të Australisë, në garën e tretë nga fundi në këtë sezon të Moto GP-së, fitues ka dalë britaniku Cal Crutchlow, me një LCR Honda. Ka qenë fitorja e dytë për të gjatë këtij kampionati, si dhe e dyta në karrierë në Moto GP.
Marc Marquez, që tanimë e ka fituar kampionatin dhe është kampion bote në Moto GP, u nis i pari në start në Phillip Island, për t’u parakaluar nga Pol Espargaro. Por spanjolli i Repsol Honda-s do të rikthehej shpejt në krye, pa mbaruar ende xhiroja e parë.
Marquez do të rrëzohej ndërsa e kryesonte qetësisht garën, duke i dhënë mundësi Crutchlow-it të udhëhiqte e të fitonte në fund.
I jashtëzakonshëm ka qenë pilotimi i Valentino Rossi-t, që nga vendi i 15-të në nisje, përfundoi i dyti, veçse pa mundur t’i afrohej britanikut.
Maverick Vinales plotësoi podiumin me vendin e tij të tretë. Dovizioso, Espargaro e Lorenzo, pasuan në finish në vend të katërt, të pestë e të gjashtë.
Më 30 tetor garohet në Malajzi, kurse kampionati mbaron më 13 nëntor, në Spanjë, në garën e fundit sezonale. /tesheshi.com/
