Çmimi i Madh i Britanisë në Moto GP ka ofruar në orët e pasdites emocione të jashtëzakonshme. Në Silverstone ka triumfuar Maverick Vinales, që ka kryesuar me Suzuki-n e tij, për të arritur një fitore historike.
Gara ka nisur keq, me një incident mes dy pilotëve, Loris Baz dhe Pol Espargaro, që janë rrëzuar. Flamuri i kuq ka ndërprerë garën pa mbaruar xhiroja e parë, për të nisur pas disa minutash, ndërkohë që dy pilotët janë çuar në qendrën mjekësore.
Rinisja e garës ka patur për protagonistë Crutchlow-in, Rossi-n dhe Vinales-in. Ky i fundit do të parakalonte Crutchlow-in në kryesim, duke udhëhequr deri në fund të garës.
I jashtëzakonshëm ka qenë rivaliteti mes dy pretendentëve për titull, Marc Marquez-it dhe Valentino Rossi-t. Spanjolli do të gabonte dy herë në frenim, duke dalë jashtë piste, çka do ta bënte ta humbiste dhe podiumin, por më parë ai ofroi momente fantastike në dyluftimin me Rossi-n.
Iannone po ashtu do të gabonte, duke u rrëzuar pesë xhiro para përfundimit të garës, ndërkohë që ishte mes grupit të pilotëve të parë.
Në fund, Vinales ka gjetur fitoren e tij të parë në Moto GP, duke e kaluar i pari finishin. Pas tij ka ardhur britaniku Crutchlow, fituesi i garës së shkuar. Rossi është kënaqur me vendin e tretë në podium. Dy pilotët e Honda-s, Marquez e Pedrosa, janë renditur në vend të katërt e të pestë.
Marc Marquez kryeson në renditjen e përgjithshme me 201 pikë, me Rossi-n në vend të dytë me 160 pikë. /tesheshi.com/
