Spanjolli i Repsol Honda-s u bë fituesi i tetë në 13 gara të kampionatit të Moto GP-së, diçka që ndodh për herë të parë që prej nisjes së këtyre garave në vitin 1949.
Në garën e Misanos, mijëra të apasionuar pas motorëve kishin ardhur të mbështesnin Valentino Rossi-n, veteranin italian që piloton me Jamaha.
Gara do të niste me Jorge Lorenzo-n që do të merrte kryesimin, për t’u parakaluar brenda një kohe të shkurtër nga Rossi, që do të vijonte i qetë pilotimin.
Por Rossi nuk e dinte se ndryshe nga ç’pritej, nuk do të ishin Lorenzo e Marquez rivalët e tij, por një pilot që do të vinte nga prapavija.
Dani Pedrosa e nisi garën nga vendi i tetë, për të bërë përpara xhiro pas xhiroje. Si një nga dy pilotët në pistë që kishte zgjedhur goma të buta për motorin, kohët e tij do të ishin shumë më mira se të atyre që i kishte përpara.
Pasi kishte parakaluar Marquez-in e Lorenzo-n, Pedrosa do ta merrte kryesimin në xhiron e 22-të, kur do të linte pas Rossi-n.
Spanjolli nuk do ta lëshonte vendin e parë më, për të shkuar në finish i vetëm. Kjo ishte fitorja e tij e parë që nga Çmimi i Madh i Malajzisë tetorin e shkuar.
Rossi do ta kalonte finishin i dyti, me 2.837 sekonda më shumë se fituesi. Atë do ta pasonin Lorenzo e Marquez.
Me pesë gara të mbetura gjer në fund të kampionatit, Marc Marquez kryeson në renditje me 223 pikë. 43 pikë më pak ka Rossi, që sheh t’i bëhet gjithnjë e më i vështirë synimi për t’u shpallur përsëri kampion. /tesheshi.com/
