Cal Crutchlow ka bërë sot të papriturën e madhe, duke u shpallur fitues në garën kaotike në Brno të Çekisë. Ai i jep kështu fund një pritjeje 35-vjeçare për të parë një pilot britanik në majën e podiumit të garave të Moto GP-së.
“Eshtë dita më e mirë e karrierës sime garuese,” deklaroi 30-vjeçari britanik, i cili piloton një LCR Honda, e që mban aktualisht vendin e dhjetë në renditjen e përgjithshme.
Para garës së 11-të sezonale, e cila u zhvillua në Brno të Çekisë, do të binte një shi i rrëmbyeshëm, që i vuri të gjithë pilotët në dilemën se me çfarë gomash duhej të niseshin në start.
Britaniku siç duket bëri zgjedhjen më të mirë, pasi u nis i dhjeti, e qe i pesëmbëdhjeti pas mbarimit të xhiros së parë. Crutchlow do ta merrte kryesimin shtatë xhiro nga fundi i garës, për ta fituar në fund atë, e për t’i dhënë të parën fitore dhe ekipit të tij.
Me të u ngjitën në podium dhe Valentino Rossi, që u rendit i dyti, me 7.298 sekonda më shumë, e Marc Marquez, kryesuesi i kampionatit.
Kampioni i botës, Jorge Lorenzo, përfundoi i 17-ti pas strategjisë së gabuar.
Renditjen e Moto GP-së e kryeson Marquez, me 197 pikë pas 11 garash, i ndjekur nga Rossi me 144 pikë. /tesheshi.com/
