Moti i rënduar ka detyruar shefin e ekzekutivit shqiptar, Edi Rama, që të mbledhë në zyrën operacionale drejtues të institucioneve për masat që janë marrë për të përballuar situatën, e cila pritet të përkeqësohet akoma dhe më tej, sidomos me uljen e temperaturave në orët në vijim.
Duke bërë një paraqitje të situatës, Rama ka deklaruar se masat e deritanishme kanë qenë sa të domosdoshme, aq edhe efikase. “Ne jemi të angazhuar për të përballuar situatën dhe kemi ngritur shtabet e emergjencave. Akset rrugore për momentin janë të hapura”, ka thënë Rama. Kreu i qeverisë ka nënvizuar se, është e domosdoshme që qytetarët të kufizojnë lëvizjet dhe se pezullimi i aktivitetit arsimor ka qenë po ashtu i nevojshëm.
Shemsi Prençi, Drejtor i Emergjencave Civile, në raportimin e tij u shpreh se, “ëmergjencat Civile paralajmërojnë se reshjet e dëborës do të zbresin deri në lartësinë 200 metra dhe mundet të prekin edhe zonën bregdetare. Aktualisht 1/ 3 e vendit është e zbardhur. Dy segmente rrugore janë të bllokuara: Bogë- Theth dhe pjesa e Vermoshit. Në tre ditë do të kemi ulje të temperaturave deri në – 20 gradë. Edhe Shqipëria e Mesme do të jetë e perfshire nga ngrica. Kompanitë kontraktore nuk kanë kripë mjaftueshmë për të përballuar siutatën dhe sot janë marrë masa urgjente për t’u furnizuar të gjitha me kripë mjaftueshëm për të përballuar situatën. Po ashtu, janë ngritur shtabet e emergjencave në të gjitha qarqet”. /tesheshi.com/
