Tashmë nuk ka ditë që eksponentë të lartë të LSI-së të mos bëjnë të ditur se mes tyre dhe PS-së hendeku po rritet çdo ditë dhe aleanca qeveritare është më shumë se e çarë.
Pas Ilir Metës që kujtoi se partia e tij është një lëvizje në kuptimin e plotë të kësaj fjale, pra nuk qëndron dot një vend, kanë qenë numri dy i LSI-së dhe një nga ministrat e saj që kanë treguar përplasjen me partinë e Edi Ramës.
Petrit Vasili, kreu i grupit të deputetëve të LSI-së ka sulmuar aleatin e tij kryesore si për reformën zgjedhore ashtu edhe për buxhetin.
Pasi e ka akuzuar Ramën se i do deputetët t’i përzgjedhë në laborator, ka folur për një qëndrim të ndryshëm të LSI-së.
“Nuk mund të ketë kushte të pakapërcyeshme, por tavolina duhet të jetë gjithmonë e hapur për të diskutuar pasi tavolinat e mbyllura nuk sjellin ndonjë progres. Tavolinat e hapura për mendime dhe alternativa, jo vetëm nga partitë e rëndësishme parlamentare siç është LSI-ja, por edhe nga partitë të cilat nuk janë në parlament, besoj se do t’i bëjnë mirë procesit, nuk i bëjnë asnjë dëm”, tha Vasili.
LSI i ka kërkuar Edi Ramës që të miratojë në parlament të gjitha licensat e mëdha dhe koncensionet; e për këtë ka paraqitur dhe një draft.
Vasili deklaroi për këtë se “nuk jam i qartë sinqerisht për arsyet e zgjatjes, por konkretisht ligji ka zhvilluar dy seanca në Komisionin e Veprimtarisë Prodhuese, pra ku është paraqitja e tij në parim nga ana ime”.
Ndërkaq, një ministër lësëist i qeverisë Rama ka dalë kundër një taksës që ka përgatitur qeveria siç është ajo e makinave.
Kreu i Mjedisit, Lefter Koka, kërkon që qeveria të konsiderojë në paketën fiskale mospërfshirjen e akcizës të gazit të automjeteve.
“Unë kërkoj të rishikohet ky qëndrim, për këtë lëndë (gazin e automjeteve) pasi në të kundërt duke mos stimuluar përdorimin e tij, ne nuk do të jemi në gjendje të mbajmë këtë angazhim që kemi marrë”, tha Koka në Komisionin Parlamentar për Veprimtarinë Prodhuese, Tregtinë dhe Mjedisin, ku prezantoi edhe Projektbuxhetin e dikasterit të tij për vitin 2017.
Përplasjet mes PS-së dhe LSI-së në publik duket se i ngjajnë një teatri, pasi në mbledhjet e brendshme mësohet se gjithçka shkon ftohtë por sipas zonave të influencës.
I vetmi raport i acaruar është ai mes Edi Ramës dhe Ilir Metës të cilët komunikojnë me kode verbale duke iu ruajtur secili njëri-tjetrit se mos përgjohen.
/tesheshi.com/
