Rrënjët e krizës së rëndë institucionale që po përjeton Kosova me pamundësinë për të zgjedhur kreun e ri të Kuvendit, Vetëvendosje i sheh tek një vendim i Gjykatës Kushtetuese dhënë tre vjet më parë.
Aktgjykimi KO119/14 vendosi që në Kosovë të institucionalizohet kriza, u tha në një deklaratë për mediat nga VV
“Kushtetuta shkruan se e drejta për propozim të Kryetarit të Kuvendit i takon ”grupit më të madh parlamentar” dhe kjo në të gjitha vendet me demokraci parlamentare interpretohet si e drejtë e atij grupi që ka me vete shumicën e mjaftueshme për ta zgjedhur Kryetarin. Pra nëse nuk e ka njëri grup, kalohet te grupi tjetër për të parë se a e ka atë shumicë. Mirëpo Gjykata Kushtetuese vendosi ta lexojë Kushtetutën në mënyrë perverse, duke u shprehur se kjo e drejtë i takon vetëm subjektit më të madh të regjistruar në KQZ. Pra, jo më Kuvendi e Grupi Parlamentar, por KQZ-ja dhe Subjekti Politik na u bënë kategori kushtetuese dhe faktorë për zgjidhjen e Kryetarit të Kuvendit. Ky vendim i Gjykatës Kushtetuese u ndërmorr në një periudhë kur vendi ishte fare pranë çlirimit prej kapjes së shtetit nga ana e PDK-së. Dhe siç po shihet, edhe tre vjet më vonë, ky vendim është kryekëput instrument në dorë të PDK-së, e cila për p ushtet është gati edhe ta shkatërrojë shtetin që e ka kapur dhe e ka bllokuar”, thuhet në deklaratën e Vetëvendosjes. /tesheshi.com/
