Nga Blendi Gashi
Alternativa që ushtria të themelohet përmes ndryshimit të ligjit për FSK-në, aktualisht nuk përkrahet nga ndërkombëtarët. Kështu tha saktësisht më 14 shkurt kryeministri Mustafa ndërsa në Kuvend po diskutohej nga ligjvënësit për (mos)themelimin e ushtrisë.
Por ky paralajmërim i Mustafës duke iu referuar BE-së asapak nuk po i bën përshtypje presidentit Thaçi i cili pas tre vitesh sërish i është kthyer premtimeve për bërjen e ushtrisë.
Ai, dje nga Kazerma “Adem Jashari”, paralajmëroi se shumë shpejt do marrë iniciativën që pikërisht përmes ndryshimit të ligjit të nis formimin e ushtrisë, por nuk dha një datë se kur mund të dërgohet ligji në Kuvend.
“Kushtetuta moderne e Kosovës, mua si Komandant Suprem i Forcave të Sigurisë së Kosovës më jep kompetenca të mjaftueshme për të ndërmarrë iniciativën për të ndryshuar ligjin e FSK-së. Ky transformim i natyrshëm ligjor është krejtësisht kushtetues dhe i domosdoshëm, në mënyrë që FSK-ja të fillojë edhe zyrtarisht procesin e anëtarësimit në NATO”, tha Thaçi.
Presidenti, kështu haptaz i është kundërvënë ndërkombëtarëve, konkretisht sekretarit të ri të Mbrojtjes së SHBA-ve, James Mattis, i cili javë më parë haptas shprehu qëndrimin se “ushtria mund të bëhet vetëm përmes ndryshimeve kushtetuese me mbështetjen e Parlamentit”.
Kjo i bie se pa votën e deputetëve serbë nuk mund të ecet përpara, për çka dihet se ata janë kategorikisht kundër formimit ushtrisë.
Ja ç’thotë opozita…
Iniciativa e Thaçit nga partitë opozitare po shihet më shumë si një premtim i radhës i tij dhe shprehin qëndrime të ndryshme rreth asaj nëse do e mbështesin këtë iniciativë.
Nënkryetari i Lëvizjes Vetëvendosje, Driton Çaushi, beson se ky është vetëm një premtim i radhës i Thaçit dhe se nuk do të rezultojë me seriozitet.
“Ky është një premtim i radhës. Premtime të tilla ka kohë që vijnë nga i ashtuquajturi president. Megjithatë, jemi të gjithë dëshmitarë se asnjëra prej tyre nuk ka rezultuar me seriozitet dhe nuk ka pasur asnjë gatishmëri dhe përkushtim për një gjë të tillë. Qëndrimi i Lëvizjes ka qenë në vazhdimësi i qartë dhe e kemi mbështet në vazhdimësi formimin e Ushtrisë së Forcave të Armatosura të Kosovës duke ndryshuar kushtetutën për ta ndryshuar një gjë të tillë”, ka thënë Çaushi, për mediat kosovare.
Ai thekson se kjo çështje nuk duhet negociuar me asgjë tjetër përveç ndryshimit të Kushtetutës.
“Ne mendojmë që formimi i trupave Forcave të Armatosura të Kosovës duhet të vijë me ndryshimin e kushtetutës për ta mundësuar një gjë të tillë dhe mendojmë që kjo çështje nuk duhet negociuar me asgjë tjetër. Ne mendojmë që kjo është rruga e drejt për t’ju qasur kësaj çështjeje”, ka shtuar ai.
Pal Lekaj, nga Aleanca për Ardhmërinë e Kosovës thotë se Thaçi disa herë ka dhënë deklarata të forta për formimin e ushtrisë por që nuk ka kryer punë.
Ai thotë se AAK ka dhënë solucionet se si do të mund të bëhej Kosova me ushtri pa qenë e nevojshme ndryshimet kushtetuese.
“Në kohët e fundit deputeti, Daut Haradinaj ka organizuar debat në parlamentin e Kosovës për këtë çështje nga ku është votuar edhe një rezolutë. Hashim Thaçi është e disata herë që për ketë temë jep deklarata të forta por punën nuk e ka kryer asnjëherë e urojmë që kësaj radhe te mos jetë ashtu. Këtë e themi se presidenti i sotëm është mësuar të lëshojë deklarata populiste e në fakt Kosova ka nevojë për veprime që e sigurojnë qenien e saj e jo për deklarata. Ne e kemi thënë dhe po e përsërisë sa herë është në pyetje interesi i Kosovës, e sidomos tani kur po bëhet fjalë për ushtrinë e saj jemi të gatshëm të japim kontributin tonë që kjo edhe të bëhet”, ka thënë Lekaj, për tesheshi. com.
Zafir Berisha, deputet i NISMA për Kosovën shprehete Thaçi deklaratat e fundit për ushtrinë i ka bërë për konsum të politikave ditore, siç thotë sa për të bërë lajm.
“Iniciativa vjen nga një njeri jo serioz që Kosova nga 2013-ta nuk ka mundur të bëj një hap para drejt formimit të ushtrisë. Jemi me përkrah ushtrinë por jo deklartat boshe dhe muhalifet e Hashim Thaçit”, thotë Berisha, për tesheshi. com.
Kujtojmë se më 14 shkurt Kuvendi miratoi një Projektrezolutë të propozuar nga deputeti i AAK-së, Daut Haradinaj, e cila përmban dy pika:
– Qeveria e Kosovë autorizohet që sa më parë të koordinojë dhe procedojë strategjinë për transformim të Forcës së Sigurisë dhe Kosovës në Forca të Armatosura të Kosovës.
– Duke shprehur përkushtimin për integrimin në organizata e paktit veriatlantik në NATO, Kuvendi i Kosovës, Qeveria e Kosovës dhe mekanizmat tjerë të bashkërendojnë hapat për harmonizimin në përpjekje me NATO dhe SHBA-në zhvillimin e kapaciteteve të Forcës së Sigurisë së Kosovës konform mandatit të autoriteteve të Kosovës. /tesheshi.com/
