Nga Bashkim Kastrati
Që nga viti 2012 institucionet e Kosovës e kanë të pamundur që të blejnë vetura të tipit “Mercedes”, të cilat prodhohen nga kompania e njohur gjermane “Daimler”. Kjo pamundësi është për faktin se kjo kompani ka hequr dorë nga pjesëmarrja në tendera publikë të cilat shpallen nga institucionet shtetërore të Kosovës. Ky vendim tash e tri vite nuk ka ndryshuar.
Siç është raportuar në media, ky vendim ka ardhur për shkak të nivelit të lartë të korrupsionit në Kosovë dhe mosluftimi i korrupsionit. Por duhet cekur faktin se “Daimler” për disa vite i ka shitur vetura “Mercedes” institucioneve të Kosovës edhe kur kishte nivel të lartë të korrupsionit, ndërsa ndalimi i menjëhershëm në marrjen pjesë në tenderë krijon dyshime se mund të ketë pasur tendenca që edhe dikush nga kjo kompani të korruptohet.
Pra e thënë më thjesht, kjo kompani nuk pranon as të marrë para nga institucionet që i konsideron të korruptuara, e lerë më që t’i shkojë ndërmend që të bëjë ndonjë investim kapital në Kosovë. Sipas raportit të “Transparency International” për indeksin e korrupsionit për vitin 2014, Kosova renditet në vendin e 110, që do të thotë se është ndër vendet më të korruptuara në Botë.
Sidoqoftë, ky fakt është një treguesi qartë për nivelin e lartë të korrupsionit në Kosovë, ndërsa hezitimi i kësaj kompanie që të mos marrë pjesë në tenderat e institucioneve shtetërore në tri vitet e fundit, tregon se nuk ka progres në luftimin e kësaj dukurie. Për më shumë injorimi që i ka bërë Kosovës një kompani aq e madhe, tregon edhe për imazhin e keq të Kosovës, pasi që refuzohet edhe t’i shiten vetura që kapin vlera të mëdha financiare.
Kujtojmë që edhe kompani tjera kanë pasur probleme për shkak të korrupsionit në Kosovë, siç ka qenë rasti i tenderit për pasaporta biometrike, ku 1.4 milionë euro janë avulluar, dhe në vend që të shkojnë tek kompania prodhuese nga Austria, kanë përfunduar në gjepin e ndërmjetësuesve shqiptar dhe tashme të “famshmes” Natali Velija, e cila është dënuar me 12 vjet burg dhe 25 mijë euro gjobë.
Ky skandal ka bërë që edhe shumë kompani tjera të mëdha të mendojnë mirë para se të bëjnë pazare me institucionet qeveritare apo t’u ofrojnë shërbime atyre.
Nuk dihet kur do të hiqet ndalesa, përfaqësuesi i “Mercedes” për Kosovë nuk ka përgjigje
Zyrtarët e kompanisë “Daimler Ag” kanë bërë të ditur se kanë vendosur me Kosovën të bëjnë biznes vetëm si transaksione të drejtpërdrejta, gjë që, sipas tyre, garanton një shkallë të lartë të transparencës në proceset biznesore. “Ne kemi vendosur të bëjmë biznes me institucionet qeveritare dhe organizatat ndërkombëtare vetëm si transaksione të drejtpërdrejta me një numër vendesh, ku përfshihet edhe Kosova. Kjo na garanton një shkallë të lartë të transparencës në proceset biznesore”, ka theksuar më herët për gazetën ‘Zëri’ Ute West von Vellberg, menaxher i lartë për komunikime, integritet dhe çështje ligjore në “Daimler Ag” në Shtutgard të Gjermanisë.
Pas pamundësisë për të blerë këtë lloj të veturës, institucionet shtetërore kanë blerë vetura të markave tjera si Wolksvagen, Peugeot, KIA, Ford etj.
tesheshi.com ka kontaktuar me kompaninë “Auto Mita”, e cila është përfaqësues i autorizuar për shitje dhe servisim të autoveturave dhe automjeteve komerciale të Mercedes-Benz. Të pyetur përse ishte marrë vendimi për t’i mos shitur vetura institucioneve shtetërore të Kosovës dhe se a pritet që të ndryshojë ky qëndrim, përfaqësues të kësaj kompanie janë prononcuar shkurt se “nuk kemi përgjigje”.
Nuk i duan as paratë e “korruptuara”
Analisti Faik Krasniqi, ka thënë për tesheshi.com se vendimi i gjigantit gjerman të automobilave “Daimler”, që të mos ua shes veturat e tyre “Mercedes” Qeverisë së Kosovës, është për shkak të shkallës së lartë të korrupsionit në Kosovë, bazuar në raportet e “Transparency International”, sepse sipas tij ajo është kompani gjigante botërore dhe nuk ka dëshirë të merret dhe të bëjë tregti me një pushtet korruptiv dhe të kriminalizuar.
“Kjo tregon se Kosova nuk i ka punët mirë, sepse ka pushtetarë dhe sistem të korruptuar dhe të kriminalizuar. Sinjal shumë më i qartë për këtë popull, se këtë pushtet dhe këtë klasë politike, duhet ta shporrin njëherë e mirë nga skena politike, nëse duam të na vijnë edhe investime të huaja, por edhe të zhvillohemi ekonomikisht dhe si shtet”, thotë Krasniqi.
Ndërsa analisti Blerim Burjani ka thënë për tesheshi.com se kompanitë mëdha ndërkombëtare janë të kujdesshme në drejtimet e bërjes së biznesit dhe se nuk dëshirojnë të jenë pjese e skandaleve, sepse mund të dëmtohen në tregun ndërkombëtar. Ai thotë se afera e pasaportave edhe disa afera tjera të institucioneve, kanë shtyrë shumë kompani ndërkombëtare që të heqin dorë ose mos të jenë të interesuar të investojnë apo të bashkëpunojnë për shkak të imazhit të keq që ka krijuar Kosova sa i përket mos luftimin e korrupsionit apo mos interesimit për të ndal familjarizimin dhe shtetin partiak.
“Dihet Kosova është shtet partiak i njerëzve dhe partive por jo i qytetarëve, në secilën pore të jetës vërehet tendenca për përfitime personale nga partitë në pushtët asgjë më mirë nuk është as kjo opozitë. Andaj përmirësimi i imazhit të Kosovës nuk mund të bëhet përmes ndërtimit të bordeve partiake dhe familjare. Kështu që ka shumë kompani nga shtetet perëndimore që kanë hequr dorë kaherë për të bërë biznes me këto institucione, tash ju e dini me përjashtim të kompanive turke që vijnë të tjera nuk ka, pra nuk ka kompani tjera perëndimore serioz për të ardhur dhe bashkëpunuar me këto institucione”, thotë Burjani. /tesheshi.com/
