Forcat ukrainase arritën të zmbrapsin forcat tokësore ruse të mbledhura pak më shumë se 30 km në veri të kryeqytetit Kiev, shkruan CNN. Por ndërsa parashikimet e inteligjencës amerikane se qyteti do të bjerë brenda një deri në katër ditë pas sulmit rus nuk janë realizuar, zyrtarët amerikanë paralajmërojnë se presidenti rus Vladimir Putin mund të intensifikojë sulmet.
Rezistenca më e fortë se sa pritej dhe gabimet logjistike nga Rusia kanë ndalur përparimin, thonë zyrtarët amerikanë dhe perëndimorë, duke ndezur një optimizëm të brishtë. SHBA-ja vazhdon të ndajë inteligjencën me ukrainasit, duke përfshirë lëvizjet e ushtrisë ruse për të ndihmuar Ukrainën në fushën e betejës, thanë dy burime për CNN.
Por zyrtarët e inteligjencës dhe mbrojtjes, të cilët po monitorojnë nga afër përparimin e Rusisë, thonë se Putin ka ende një numër lëvizjesh në rezervë që mund të shkatërrojnë rezistencën e Ukrainës.
“Nga pikëpamja ushtarako-taktike, Rusia ka fuqinë njerëzore dhe fuqinë e zjarrit për të marrë Kievin, pavarësisht se sa rezistencë bëjnë ukrainasit. Nuk ka dyshim për këtë”, tha një burim amerikan i njohur me inteligjencën.
Rreth një e katërta e trupave ruse të mbledhura nuk kanë hyrë ende në Ukrainë, u tha gazetarëve të hënën një zyrtar i lartë i mbrojtjes – një “valë e dytë” e mundshme, sipas dy burimeve të inteligjencës. Zyrtarë të tjerë të mbrojtjes thonë se Putini mund të urdhërojë bombardime shumë më të fuqishme, duke përfshirë sulme ajrore me raketa me rreze të gjatë.
“Ata janë të ngadalshëm dhe të frustruar sepse nuk po përparojnë në Kiev, dhe kjo mund të rezultojë në një rishikim të taktikave të tyre dhe t’i bëjë ata më agresivë dhe të hapur në shkallën e sulmit ndaj Kievit”, tha të hënën një zyrtar i lartë i mbrojtjes. /tesheshi.com/
