Përfaqësuesi i Rusisë për Klimën dhe Zhvillimin e Qëndrueshëm, Anatoli Chubais, ka dhënë dorëheqjen dhe është larguar nga vendi, duke përmendur kundërshtimin ndaj luftës së Presidentit Vladimir Putin në Ukrainë, duke e bërë atë zyrtarin më të lartë që u nda me Kremlinin për pushtimin, raportoi Bloomberg, duke cituar burime pranë administratës ruse.
Agjencia shtetërore ruse e lajmeve TASS citoi një burim të afërt me Chubais të ketë konfirmuar se ai kishte dhënë dorëheqjen, raporton Bloomberg.
Chubais është tashmë në Turqi dhe nuk ka plane të kthehet në Rusi, thanë dy burime pranë tij për faqen e internetit të RBC.
Chubais, 66 vjeç, është një nga reformatorët e paktë ekonomikë të viteve 1990 që mbeti në qeverinë e Putinit dhe mbajti lidhje të ngushta me zyrtarët perëndimorë.
Zëdhënësi i Kremlinit Dmitry Peskov nuk i është përgjigjur ende një pyetjeje të gazetarit të Bloomerg për të komentuar mbi akuzat.
Chubais, i njohur si arkitekti i privatizimeve ruse në vitet 1990, i dha Putinit punën e tij të parë në Kremlin në mesin e viteve 1990 dhe fillimisht mirëpriti ngritjen e tij në pushtet në fund të dekadës. Nën Putinin, Chubais më pas mori poste drejtuese në kompanitë e mëdha shtetërore derisa presidenti e emëroi atë një të dërguar për zhvillimin e qëndrueshëm vitin e kaluar.
Që nga fillimi i agresionit ndaj Ukrainës, qeveria ruse ka rritur presionin ndaj kritikëve vendas të pushtimit.
Më 16 mars, Putin paralajmëroi se do ta pastronte Rusinë nga “llumrat dhe tradhtarët” të cilët akuzohen se punojnë fshehurazi për Shtetet e Bashkuara dhe aleatët e saj. Përballë kolapsit ekonomik, lideri rus akuzoi Perëndimin se dëshiron të shkatërrojë Rusinë. /tesheshi.com/
