Nga Blendi Gashi
Janë bërë saktësisht një javë kur kryenegociatorja, Edita Tahiri paralajmëroi se brenda pak ditësh do të rrënohet muri i ngritur nga serbët në veri të Mitrovicës. Por, edhe pas kësaj kohe një gjë e tillë nuk ka ndodhur, duke lënë të kuptohet se një deklaratë e tillë është dhënë më shumë për të shuar zërat kundërshtues.
Ndërsa reagimet po rriten në vijimësi, qeveria “Mustafa” me heshjten dhe mos veprimin sikur është dorëzuar dhe po e pranon se shembja e murit është një sfidë e madhe, dhe ndoshta e parealizueshme, të paktën për momentin.
Në anën tjetër kryetari i Mitrovicës së Veriut, Goran Rakiq, vazhdon të mbetet i palëkundur në qëndrimin e tij se muri s’do të rrënohet tërësisht.
Duke parë deklarimet tërësisht të kundërta të palëve dhe qëndrimin e Bashkimit Evropian se nuk përzihet në këtë çështje pasi nuk është projekt i tyre, mundësitë për rikthimin e tensioneve në veri në kohën kur u mendua se gjendja pas 17 vitesh po normalizohet në këtë pjesë, nuk përjashtohen.
Mllefin e tyre për murin e shprehën dje edhe një grup prej 100 veteranësh të UÇK-së që qëndruan pranë urës së Ibrit. Ata edhe pse ironizuan duke thënë se janë dalë në këtë pjesë për të ngrënë fara dhe pirë qajë, njëherit paralajmëruan se do të protestojnë nëse institucionet nuk veprojnë.
Pra, shtrohet pyetja, a do t’i rikthej tensionet në veri muri ilegal?
Organizata nga Mitrovica dhe ekspert të sigurisë paralajmërojnë se lehtë mund të destabilizohet situata, derisa një gjë të tillë nuk e besojnë ligjvënësit.
“Muri po e ndan Mitrovicën”
Bujar Voca, aktivist nga Iniciativa Qytetare për Veprim nga Mitrovica, thotë se muri nga betoni e ndanë këtë qytet dhe njëherit tensionon situatën.
Ai thotë se Serbia po e kontrollon veriun e Kosovës, pasi ka bërë spastrim etnik duke i dëbuar shqiptarët nga atje, u ka djegur shtëpitë dhe uzurpuar pronat, derisa ka themeluar institucione paralele dhe ilegale.
“Nëse qeveria dhe BE si garantuese e negociatave nuk ndërmarrin hapa për rrënimin e murit dhe ndaljen e planeve të Serbisë për ndarjen e Kosovës me siguri se situata do të eskaloj dhe do të rikthehet dhuna. Ndërtimi i murit vetëm po e shpërfaq problemin e veriut, sepse atje Serbia po bën njëherazi shumë veprime politike të cilat po e rrënojnë shtetin tonë dhe po e bëjnë jofunksional”, thotë Voca, për tesheshi.com.
Njohësi i çështjeve të sigurisë, Burim Ramadani, thotë se institucionet duhet të jenë të matura dhe njëkohësisht të vendosura që të shembin murin.
“Muri është shenjë direkte për tensionimin e vazhdueshëm të situatës së sigurisë në Kosovë dhe shenjë për problemet e pazgjidhura. Kosova, respektivisht institucionet qendrore, duhet të jenë të matura, por gjithsesi të paluhatura në largimin e këtij muri dhe në zgjidhjen e problemeve. Reagimet e nxituara nuk ndihmojnë, njëjtë sikurse nuk ndihmon as mosveprimi institucional”, thotë Ramadani, për tesheshi.com.
“S’besoj se mund të plasin trazira”
Deputeti opozitar Zafir Berisha, për dallim nga dy të lartcekurit nuk beson se mund të shkaktohen tensione në veri, pasi sipas tij për ndërtimin e murit është arritur një dakordim paraprak në heshjte mes udhëheqësit e shtetit, siç thotë ai për interesa personale janë bërë pjesë e ndarjes së Kosovës.
“Nuk besoj se mund të shkaktohen trazira. Me pas guxim qeveria duhet të heq murin, por ndërtimi i tij është pjesë e marrëveshjeve të dëmshme që janë barabartë me tradhëtinë”, thotë deputeti Berisha, për tesheshi.com.
Ndryshe, Iniciativa Qytetare për Veprim dje përmes një aksioni simbolik para zyrave qendrore të Bashkimit Evropian në Prishtinë vendosi një mur, në shenjë revolte, pasi sipas saj BE nuk po e ndihmon Kosovën, por Serbinë, t’i implementojë planet e saj si në integrim, ashtu edhe në izolim të Kosovës.
Kjo iniciativë ka paralajmëruar aksione të tilla simbolike edhe në ditët në vijim para ndërtesave të institucioneve të vendit./tesheshi.com/
