Presidenti serb Vuçiç tha së fundi se Evropa po i kërkon Serbisë që ta njohë pavarësinë e Kosovës.
“De facto ose de jure. Kjo po kërkohet. Le të mos gënjejmë për këtë gjë. Fuqia më e madhe, Bashkimi Evropian po e kërkon këtë”, tha Vuçiç në Pink.
Më tej, ai shpalosi atë që e quajti “mospajtim” të shoqërisë serbe kur vjen fjala për Kosovën.
“Ne mund ta gënjejmë veten se kemi pajtim për këtë çështje. Sigurisht që nuk kemi. Sigurisht që një pjesë mendon se Kosova duhet të dorëzohet sa më shpejt që të jetë e mundur sepse Serbia do të ishte më e shëndetshme, por ata këtë nuk e thonë dhe nuk duhet ta thonë publikisht. Të tjerët do të thonë se ‘Kosova dhe Metohia’ duhet të mbrohet me çdo kush, por pa mua dhe fëmijët e mi”, tha ai.
Këto deklarime të Vuçiçit ngjajnë si teste që ai ia bën opinionit e kastës politike serbe, lidhur me Kosovën. Vetë ai këmbëngul se nuk do e njohë kurrë pavarësinë e saj.
Kujtojmë se në Kushtetutën serbe, Kosova vazhdon të konsiderohet pjesë e Serbisë. /tesheshi.com/
