Ministria e Italisë njoftoi të martën se do të heqë një foto të diktatorit fashist Benito Musolini nga një mur pas kritikave nga sindikatat dhe një ish-ministër.
Trashëgimia e Musolinit është sërish një temë e nxehtë në Itali, e cila po përgatitet për ardhjen e qeverisë së ekstremit të djathtë të udhëhequr nga Vëllezërit e Italisë të Giorgia Melonit, më radikalja që nga Lufta e Dytë Botërore.
Kjo parti i ka rrënjët në Lëvizjen Sociale Italiane post-fashiste (MSI).
Portreti i Musolinit do të hiqet “për të shmangur polemika dhe manipulime”, njoftoi Ministria e Industrisë.
Fotoja është pjesë e një koleksioni të ish-ministrave të industrisë, të prezantuar së fundmi për publikun në kuadër të festës së 90-vjetorit të selisë së ministrisë, e cila është projektuar nga arkitekti i famshëm fashist Marcello Piacentini.
Në njoftimin për shtyp thuhet se një tjetër foto e Musolinit është ekspozuar në Pallatin Chigi, në zyrën e kryeministrit, krahas portreteve të kryeministrave të tjerë italianë.
Musolini, i cili sundoi Italinë nga viti 1922 deri në 1943, është përfshirë në koleksion sepse ai ishte ministër i Korporatave, paraardhësi i ministrisë aktuale, në 1932.
Ish-udhëheqësi i qendrës së djathtë dhe ministri i industrisë Pier Luigi Bersani protestoi pasi fotografia e tij ishte shfaqur pranë asaj të Musolinit.
“Unë kërkoj me mirësi që të hiqet fotografia ime”, ka shkruar ai në një postim në Twitter, transmeton Reuters.
“Fashizmi i dorëzuar në histori”
Dega e shërbimit publik të sindikatës CGIL, më e madhja në vend, e dënoi shfaqjen e fotos si “të mjerueshme” dhe kërkoi që ajo të hiqej menjëherë.
Presidenti i sapozgjedhur i Senatit, Ignazio La Russa, iu bashkua diskutimit, i cili theksoi se fotografia e Musolinit është gjithashtu e ekspozuar në Ministrinë e Mbrojtjes dhe një obelisk i madh për nder të tij qëndron përpara Stadiumit Olimpik të Romës.
“A do t’i bashkohemi kulturës së anulimit?,” pyet La Russa, një veteran i krahut të djathtë që filloi karrierën e tij në MSI dhe mbledh relike të Musolinit.
Meloni e lavdëroi publikisht Musolinin në rininë e saj, por pretendon se partia e saj ka lënë pas rrënjët e saj post-fashiste dhe tani i përket ‘mainstream’ si Partia Konservatore Britanike.
“E djathta italiane e ka lënë fashizmin në histori për dekada, duke dënuar pa mëdyshje shtypjen e demokracisë dhe ligjet e turpshme anti-hebreje,” tha ajo gjatë fushatës zgjedhore. /tesheshi.com/
