Kosova jo vetëm që ka mbetur “pa qeveri”, duke pritur atë të renë të pas zgjedhjeve të 11 qershorit, por nuk po e mbledh dot as Kuvendin e ri të dalë nga këto zgjedhje për ta konstituuar. Madje nuk ka asnjë datë se kur do të ndodhë ky proces, që mbi të gjitha është dhe një detyrim kushtetues.
Ardian Arifaj, këshilltar politik i presidentit Thaçi, ka thënë se ende nuk është vendosur për seancën konstituive, pa dhënë arsye për vonesën.
“Ende nuk është vendosur se kur do të mbahet seanca konstituive. Kurdo që të merret vendimi, do t’ju njoftojmë”, është mjaftuar Arifaj me këtë frazë të ftohtë zyrtare duke folur për KTV-në.
Por nuk është e vështirë të kuptohet se mosmbledhja e Kuvendit të ri për t’u konsituuar, ka si shkak pamundësinë e deritanishme të PAN-it për të bërë 61 vota e formuar qeverinë.
Të qënit peng i shifrës 61, ka bërë që ta mbajnë peng dhe Kuvendin. /tesheshi.com/
