Asnjë nga partitë opozitare nuk ka marrë pjesë në takimin e thirrur nga kryeparlamentari Kadri Veseli për të arritur një konsensus për dialogun me shtetin serb.
Pas takimit që është mbajtur mes partive pjesë e koalicionit qeverisës, Veseli tha se se nuk është privilegj të ulesh në një tavolinë me Serbinë, por është sakrificë politike.
“Nevoja e reflektimit, nevoja e akumulimit të një qëndrimi politik qoftë për populizëm është legjitime e opozitës. Me Serbinë të ulesh sot nuk është privilegj, është sakrificë në të njëjtën kohë përgjegjësi. Arritja e paqes për fëmijët është përgjegjësi e të gjithëve. Mesazhi që sot do të duhej ta përçonim do të ishte konsensusi i të gjithëve”, tha Veseli.
Përkundër bojkotit që ju bë Veseli beson se do ketë një unitet për dialogun me palën serbe.
“Unë flas me shumë përgjegjësi, një pjesë e opozitës ka pranuar të marrë pjesë në dialog. Jam shumë i sigurt që do të kemi një unitet të plotë në këtë proces. Populizmi nga i cili ka fituar në zgjedhje VV-ja është dëshirë e të gjitha partive. Si qëndrim me partitë që kanë marrë pjesë është se do të marrim pjesë në procesin e dialogut, do të caktojmë vijat. Territori dhe integriteti i Kosovës është i pacenuar”, tha ai.
Kujtojmë se Vetëvendosje e cilësoi si të pakuptimtë ftesën e Veselit për takim partish, andaj e bojkotoi. /tesheshi.com/
