Nga Blendi Gashi
Në përpjekje të krijimit të një legjislacioni adekuat për konfiskim të pasurisë së fituar në mënyrë ilegale, ditë më parë Kuvendi i Kosovës miratoi në lexim të parë projektligjin për kompetencat e zgjeruara për konfiskim të pasurisë, pasi 19 vjet pas lufte nuk është shënuar asnjë rast i vetëm kur ndonjë zyrtari i është konfiskuar pasuria që e ka krijuar pa djersën e ballit.
Ministri i Drejtësisë, Abelard Tahiri, para deputetëve javë më parë u shpreh i bindur se projektligji i përmirësuar do të sjellë rezultate të prekshme.
“Jam i bindur se me këtë projektligj, po bëjmë hapin më vendimtar ndaj keqpërdoruesve, ndaj personave që merren me krim të organizuar, ndaj personave zyrtarë e politikë që mund të kenë llogaritur se do të mund të pasurohen përmes korrupsionit dhe abuzimit me pushtetin”, tha Tahiri.
Megjithatë, sipas përfaqësuesve të organizatave që monitorojnë punën e gjykatave problem nuk është çështja e legjislacionit, por mungesa e guximit për të vepruar.
Ehat Miftaraj, nga Instituti i Kosovës për Drejtësi (IKD) pohon se mungesa e rezultateve në luftimin e krimit të organizuar dhe korrupsionit, përfshirë sekuestrimin dhe konfiskimin e pasurisë së fituar në mënyrë të kundërligjshme nuk ka qene dhe nuk është si pasojë e mungesës së bazës ligjore.
“Rezultate nuk ka për shkak të politizimit të skajshëm të sistemit prokurorial, mungesës së vullnetit dhe guximit të këtij sistemi për të ushtruar kompetencat dhe përgjegjësitë në bazë të ligjit në mënyrë të drejtë, pavarur dhe paanshme. Fatkeqësisht, me këtë strukturë të sistemit, dhe me këtë menaxhment të sistemit të drejtësisë, pa një proces të Vetingut, Kosova luftën kundër kriminalitetit, sekuestrimin dhe konfiskimin e pasurisë do ta vazhdoj me retorikë boshe përmes plotësim ndryshimit të ligjeve”, thotë Miftaraj për tesheshi.com.
Isuf Zejna, nga organizata “Demokraci Plus” thotë se ligji aktual sipas Prokurorisë së Shtetit nuk u ka dhënë kompetencat e duhura për të bërë konfiskimin efikas të pasurisë së fituar në mënyrë të kundërligjshme.
Sipas tij prokurorët kanë hasur në shumë vështirësi për shkak të dykuptimësisë dhe problemeve të tjera që ka pasur ky ligj, andaj shton se aprovimi i një ligji të ri ka qenë i domosdoshëm.
Megjithatë Zejna thotë se edhe ligji i ri ka zbrazëtira.
“As ligji i ri nuk ka rregulluar disa çështje të rëndësishme, siç është barra e provës për të cilën sërish i mbetet prokurorisë në masën më të madhe të dëshmojë lidhjen e paligjshmërisë me fitimit e pronës. Prandaj Kuvendi i Kosovës duhet të ketë kujdes në mes të dy leximeve që të aprovojë një ligj i cili së pari është i zbatueshëm dhe së dyti i adreson kërkesat e prokurorëve për kompetenca dhe mjete ligjore për të kryer punën në mënyrë efikase”, thotë Zejna për tesheshi.com.
Mbi 35 milionë euro është vlera e mallrave të përfituara nga vepra penale, të krimit të organizuar, financim i terrorizmit dhe pastrim i parave, që janë sekuestruar dhe konfiskuar nga autoritetet në vend. /tesheshi.com/
