Krejt ndryshe nga Beogradi zyrtar dhe Aleksandër Vuçiçi i cili ka pranuar verdiktin e Hagës, Moska zyrtare ka qenë jashtëzakonisht e ashpër kundër vendimit për dënimin me burgim të përjetshëm të Ratko Mlladiçit.
Në daljen e zakonshme të së enjtes, zëdhënësja e Ministrisë së Jashtme ruse, Maria Zakharova, deklaroi se vendimi i Hagës ishte “I njëanshëm, i papranueshëm dhe anti-serb dhe ka rrëzuar besimin e ndërsjelltë në Ballkan”.
Duke folur me zërin zyrtar të qeverisë ruse, zëdhënësja e Ministrisë së Jashtme e ka cilësuar Gjykatën për Krime Lufte si të anëshme, pasi sipas Moskës nuk kanë rëndësi faktet për të cilat u dënua Ratko Mlladiçi, por balancimi i dënimeve.
Në mënyrë krejt të pavend, Zakharova akuzoi Hagën se ka shpallur të pafajshëm Naser Oriçin, i cili sipas saj, “I fshehur në Srebrenicë ka vrarë civilë serbë”.
E thënë kjo deklaratë nga një kancelari e një shteti të madh si Rusia nuk tregon tjetër veçse një cinizëm tej masës njerëzore.
Pasi gjithë bota e ka parë se Srebrenica qëndroi e rrethuar për mbi një vit nga forcat sparamilitare serbe dhe në atë qyteti ishin përqendruar mbi 20 mijë refugjatë muslimanë nga fshatrat përreth. Në mënyrë të ftohtë trupat e Mlladiçit vranë 8 mijë burra, duke mbajtur peng kaskat blu të OKB-së.
Naser Oriç, vetëm 20 vjeç ishte kreu u trupave mbrojtëse të qytetit dhe detyra e tij ishte vetëm të ruante civilët, e kjo vetëm me disa pushkë dhe pa municione. Srebrenica ishte e rrethuar dhe pikërisht prej asaj masakre të serbëve, Bill Clinton vendosi të bombardojë pozicionet ushtarake të Mlladiçit e Karaxhiçit.
Por zëdhënësja e ministrisë së Jashtme ruse ka shkuar shumë larg në deklaratën e saj.
Duke u bazuar te qëndrimi i kryekomandantit të NATO-s, Ben Hodges, i cili ka kërkuar që Aleanca të hyjë në bazën ruse të Nishit, Zakharova ka deklaruar se “Rusia kërkon të ketë akses në bazën amerikane në Kosovë”. /tesheshi.com/
