Moska i ka bërë thirrje Uashingtonit që të heqë qafe armët kimike sa më shpejt të jetë e mundur dhe të ndalojë insinuatën se Rusia po zhvillon këtë lloj arme, tha ambasadori rus në Shtetet e Bashkuara Anatoli Antonov, raporton TASS.
Departamenti i Shtetit i SHBA njoftoi më parë se Rusia po zhvillon programin e saj kimik.
“Eshtë një tjetër spekulim i Departamentit të Shtetit. Kjo nuk është hera e parë që kemi dëgjuar akuza të pabazuara kundër shtetit tonë, pa ndonjë provë”, shkroi Antonov në profilin e Facebook të ambasadës ruse.
Antonov shtoi se Rusia kishte kërkuar prova.
“Ne kemi propozuar një dialog profesional në mënyrë që të arrijmë tek e vërteta. Por propozimet tona mbetën pa përgjigje,” shtoi Antonov.
Ai pretendon se Rusia “shkatërroi plotësisht rezervat e armëve kimike”.
“Kjo është provuar zyrtarisht nga Organizata për Ndalimin e Armëve Kimike (OPCW). Në të njëjtën kohë, Shtetet e Bashkuara mbeten anëtari i vetëm i CWC (Konventa e Armëve Kimike) që nuk ka përmbushur detyrimet e saj për të shkatërruar rezervat”, akuzoi Antonov. /tesheshi.com/
