Ka reaguar menjëherë Rusia pas daljes së rezultateve të zgjedhjeve në Serbi dhe ka bërë thirrje për zbatimin e marrëveshjeve të firmosura.
Aleksei Pushkov tha se marrëdhëniet miqësore mes dy vendeve nuk do të ndryshohen.
Kreu i komisionit të Jashtëm të parlamentit rus, foli pas fitores së kryeministrit Vuçiç që mori 50% të votave.
“Partia në pushtet mori votat e shumicës së popullit i cili është në favor të integrimit europian dhe synon të ruajë marrëdhënie të mira me Rusinë”, tha Pushkov për agjencinë TASS.
Ai shtoi se nuk ka shenja që këto zgjedhje të jepnin një panoramë drastike të ndryshimit të kursit të Beogradit.
“Unë mendoj se do të konkretizohen marrëveshjet mes dy qeverive të nënshkruara gjatë vizitave të fundit të kryeministrit Aleksandër Vuçiç në Moskë dhe të presidentit Tomislav Nikoliç”, tha parlamentari rus.
Një nga marrëveshjet e rëndësishme mes dy vendeve është ajo e furnizimit me raketa strategjike me rreze të mesme dhe të gjatë veprimi që do të instalohen në Serbi.
Ndërkaq, Pushkov ka nënvizuar edhe rritjen e partive anti-NATO dhe filoruse si Partia Demokratike Serbe dhe Partia Radikale e Sheshelit.
“Unë mendoj se qënia e këtyre partive në parlament do të ketë impaktin e duhur në debatin politik në vend për çështjet e strategjisë së politikës së jashtme”, theksoi Pushkov. /tesheshi.com/
