Rusia i ka bërë thirrje Bashkimit Evropian që të heqë dorë nga “ambiciet neo-koloniale” dhe t’i përmbahet një qasjeje të barabartë të bazuar në respektin për vendet e Ballkanit Perëndimor.
Kështu deklaroi të premten zëvendës zëdhënësi i Ministrisë së Punëve të Jashtme ruse, Alexei Zaitsev.
Sipas Tass, Zaitsev tërhoqi vëmendjen për deklaratën e kancelarit gjerman Olaf Scholz, i cili pas takimit me kryeministrin e Kosovës Albin Kurti tha se “Ballkani Perëndimor i përket Evropës” dhe se në të ardhmen do të bëhet pjesë e Bashkimit Evropian.
Ai tha se zyrtarët e BE-së po përpiqen të inkurajojnë vendet e Ballkanit Perëndimor me deklarata të tilla jodetyruese, të cilat janë gjithnjë e më të zhgënjyera me vonesën e procesit të afrimit me BE-në.
“Gjermania dhe një numër vendesh të tjera të BE-së, të cilat duket se kanë harruar mësimet e historisë, vazhdojnë ta shohin Ballkanin Perëndimor si një sferë të interesave të tyre ekskluzive gjeopolitike dhe ta trajtojnë atë si oborrin e tyre të shtëpisë, ndërkohë që akuzojnë Rusinë se kërkon të krijojë zonat e saj të ndikimit në Evropë”, tha Zajçev.
Sipas diplomatit rus, Moska ka dënuar në mënyrë të përsëritur “praktikën e poshtër” të përdorimit të aspiratave të vendeve të rajonit drejt anëtarësimit në BE për “shantazh të dukshëm, konkurrencë të pandershme dhe shtrëngim investimesh” të vendeve joanëtare të BE-së”.
Ai tha se, nën pretekstin e ndjekjes së politikës së Brukselit, vendet e Ballkanit janë të detyruara të mbështesin sanksionet anti-ruse dhe përballen me një zgjedhje artificiale midis BE-së ose Rusisë, ku askush nuk u garanton anëtarësimin në BE në të ardhmen e parashikueshme.
“Ne i bëjmë thirrje Bashkimit Evropian që të heqë dorë nga ambiciet e tij neo-koloniale dhe t’i përmbahet një qasjeje të barabartë të bazuar në respektin për vendet fqinje, përfshirë Ballkanin Perëndimor”, tha Zajce. /tesheshi.com/
