Moska i ka kërkuar Shteteve të Bashkuara të mos ndërhyjnë në punët e brendshme të Iranit, vend i cili është përballur me protesta anti-qeveritare në ditët e fundit.
“Paralajmërojmë SHBA-të në lidhje me përpjekjet për të ndërhyrë në çështjet e brendshme të Iranit”, tha zëvendësministri i Jashtëm i Rusisë Sergei Ryabkov për agjencinë e lajmeve TASS.
Ai shprehu besimin se Irani megjithatë do të kapërcejë vështirësitë e tanishme me të cilat po përballet, duke shtuar se aktualisht ka përpjekje për të shtrembëruar thelbin e ngjarjeve në atë vend.
Ai theksoi se SHBA “me qëllim” po e përdorë situatën në Iran në përpjekje për të rrezikuar stabilitetin e Planit të Veprimit Gjithëpërfshirës të Përbashkët (JCPOA), që është marrëveshja bërthamore 2015 me Iranin.
Në fund, ai tha se Rusia është e angazhuar për ruajtjen e marrëveshjes bërthamore, si dhe zbatimin e saj të plotë në të gjitha vendet nënshkruese, veçanërisht në Shtetet e Bashkuara.
Mijëra njerëz janë shfaqur sot në rrugët e qyteteve iraniane në mbështetje të regjimit të vendit. Të pakënaqur me gjendjen ekonomike në Iran, protestuesit në qytetin e Mashhad protestuan më 28 dhjetor 2017 dhe protestat shpejt fituan karakterin antiqeveritar duke u përhapur në qytete të tjera të atij vendi.
Protestat e mbështetjes filluan me ftesën e imamëve dhe udhëheqësve fetarë. Gjatë trazirave që kanë përfshirë vendin, deri më tani kanë humbur jetën të paktën 24 persona, kurse më tepër se njëmijë protestues janë arrestuar. /tesheshi.com/
