Organizata të financuara nga Brukseli kanë lëshuar alarmin se Moska po shfrytëzon fuqishëm dobësinë aktuale të Bashkimit Europian për të rritur edhe më shumë influencën në Serbi, duke financuar disa parti politike filoruse në zgjedhjet parlamentare të 24 prillit.
Jelena Miliç, kreu i Qendrës për Studime Euro-Atlantike, e cila ka hartuar një raport për këtë çështje, thekson për gazetën Blic se qëllimi i Rusisë është që të ulet gjithnjë e më shumë mbështetja publike për integrimin në BE nga ana e popullsisë serbe në këtë kohë kur Bashkimi Europian duket i pafuqishëm ta imponojë veten si një alternativë.
“Po shikojmë një mbështetje në rënie të BE-së, dhe tani është nën 50 për qind, në një situatë ku
Parlamenti nuk ka asnjë parti kundër unionit europian.”
“Ju mund të imagjinoni se si do të jetë përkrahja kur partitë e krahut të djathtë filorus të jenë në parlament dhe kur qytetarët t’i dëgjojnë çdo ditë alternativat e tyre,” shtoi Miliç.
Eksperti Neven Cvjetićanin, nga Instituti i Shkencave Sociale, thekson se ndikimi i fuqive të mëdha si Rusia nuk zhvillohet direkt.
Ai thekson se këto vende bëjnë lobim të tërthortë, ndërmjet grupeve sociale, dhe jo në administratë.
“Rusët po bëjnë si Perëndimi dikur: paguajnë dhe rrisin influencën e tyre në media, në mënyrë që të ndikojnë në publik,” shprehet Cvjetićanin.
Një raport europian ka vlerësuar se ndikimi rus ishte i rëndësishëm, e njëkohësisht një kërcënim për pozitën e Bashkimit Europian në Serbi, pasi Moska po mbështet disa parti që pritet të bëjnë koalicion me Vuçiç pas zgjedhjeve dhe të ngjiten në qeverisjen e vendit.
Siç bën të ditur organizata CEAS, në Serbi ka 76 organizma që përfaqësojnë ideologjinë proruse, nga të cilat 19 janë organizata të shoqërisë civile, 12 janë lëvizje politike, 13 janë parti, dhe shtatë janë organizata studentore.
Jelena Miliç ka treguar se vihet re dhe një tendencë e rritjes së numrit të kurseve të gjuhës ruse, e po ashtu e krijimit të shoqërive të artit rus. /tesheshi.com/
