Në fundjavën që sapo lamë pas, Moska është goditur nga stuhia më e fuqishme në 100 vitet e fundit, dhe vetëm brenda 24 orëve të fundit janë larguar 1.2 milionë metra kub dëbore nga rrugët e kryeqytetit rus, tha nënkryetari i Bashkisë, Pyotr Birjukov.
“Një sasi kaq e madhe e borës ka rënë për herë të parë në 100 vitet e fundit. Për momentin, rrugët janë pastruar, por sigurisht kemi edhe shumë borë për të hequr. Gjatë 24 orëve të fundit janë hequr 1.2 milion metra kub nga rrugët, por pastrimi vazhdon”, tha Birjukov, sipas agjencisë Tass.
Për shkak të borës së madhe, ka pasur një ndërprerje në furnizimin me energji elektrike në 18 lokalitete të Moskës.
Është rrëzuar një pemë, kanë rënë tela elektrike përtokë, gjë që rezultoi me vdekjen e një personi dhe pesë të plagosur.
Birjukov theksoi se do të duhen nëntë ditë për të pastruar borën, nëse gjithçka shkon sipas planit.
“Ne u bëjmë thirrje shoferëve që të mos vozisin në qytet nëse është e mundur, në mënyrë që të heqim borën. Përveç rrugëve, dëbora do të largohet nga oborri, nga trotuaret dhe çatitë”, shtoi Birjukov.
Sipas mediave të Moskës, në terren ka dalur gjithashtu një brigadë inxhinierike e ushtrisë ruse, e cila ndihmon në pastrimin e qytetit.
Jandex raporton se më shumë se 100 fluturime janë anuluar për shkak të kushteve të motit.
Meteorologët parashikojnë se bora në Moskë dhe në fillimjavë dhe priten erëra deri në 36 kilometra në orë. /tesheshi.com/
