Presidenti turk Rexhep Tajip Erdogan ka premtuar respektimin e plotë të kontratës për blerjen e sistemit të raketave ruse S-400 – tha pas bisedimeve me kreun e shtetit turk në Stamboll të premten, kryetarja e Këshillit të Federatës Ruse (dhoma e lartë e Parlamentit), Valentina Matviyenko.
“Sigurisht, ai (Erdogan) preku temën e S-400. Ai tha se Turqia kishte pasur nje presion të paparë dhe i cili po vazhdon, por ai tha se, si president, garanton se Turqia do ta zbatojë këtë marrëveshje”, ka thënë ajo.
Sipas saj, Erdogan është shprehur se nuk sheh ndonjë arsye për mos-përmbushjen e detyrimeve sipas kontratës.
Nga ana tjetër, ministri e jashtëm Mevlut Çavushoglu reagoi sërish ndaj zërave kundër, në krye të të cilave janë SHBA-të, duke thënë: “Disa thonë se sistemet e S-400 paraqesin një kërcënim për avionët luftarakë F-35. Këto sisteme do të jetë nën kontrollin tonë të plotë. Ato do të integrohen në sistemin e NATO-s”, ka thënë Çavusoglu, gjatë vizitës së tij në Letoni.
Ai mohoi të mërkurën se Turqia po shtyn blerjen e sistemit S-400 për shkak të marrëdhënieve të tensionuara me Shtetet e Bashkuara. /tesheshi.com/
