Moska zyrtare, edhe pse ka telashe me të gjithë Europën për çështjen e helmimit të ish-agjentit Skripal e bijës së tij, ka paralajmëruar Kosovën që të mos bëjë hap përpara në krijimin e ushtrisë së saj.
Ministria e Jashtme ruse, ka shpallur qëndrimin e saj nëpërmjet zëdhënëses zyrtare, Maria Zakharova.
“Krijimi i Forcave të Armatosura të Kosovës nuk janë produkt i një marrëveshjeje, ndaj do të tensionojnë edhe më tej situatën”, tha Zakharova në një konferencë të rregullt për shtyp, duke komentuar deklaratat e bëra këtë javë nga Ndihmës Sekretari i SHBA e Shtetit për Evropën dhe Euroazinë, Wess Mitchell.
Mitchell tha se Kosova “ka të drejtën të formojë forca profesionale që do të merren me sigurinë” dhe se kjo “nuk do të ishte një kërcënim për Serbinë dhe serbët”.
Zëdhënësja e Ministrisë së Jashtme ruse tha se “një faktor shtesë i paqëndrueshmërisë në kontinentin evropian, ishte mënyra se si u krijua shteti i Kosovës, qëllimet që u vendosën gjatë ndarjes së Kosovës nga territori i një shteti sovran dhe mënyra në të cilën kjo lëvizje u përdor nga politika”. /tesheshi.com/
