Një zyrtar i ministrisë së Jashtme ruse i ka dorëzuar një notë proteste ambasadorit shqiptar në Moskë, bashkë me vendimin për dëbimin e dy diplomatëve.
Vendet e njoftuara nga Moska për dëbime diplomatësh ishin 23, mes tyre edhe Shqipëria.
Ambasadorit shqiptar në Rusi Arben Gazioni, i ka kërkuar sqarime një zyrtar në nivel nëndrejtori i MPJ-së ruse.
Rusia i kërkoi ambasadorëve të huaj që të dërgojnë në shtëpi një numër stafi të barabartë me numrin e rusëve që vendet respektive kanë dëbuar.
hqipërisë i është kërkuar të kthejë dy sekretarë të ambasadës, identiteti i të cilëve nuk bëhet i ditur.
Pak ditë më parë, Shqipëria dëboi dy zyrtarë të ambasadës ruse, pikërisht Vladislav Filipov, atashe ushtarak, si dhe Alexey Nikolaevich Balashov, sekretar i parë i Ambasadës.
Masat e Tiranës u morën në solidarizim dhe mbështetje me Britaninë e madhe dhe vendet e tjera perëndimore që dëbuan dhjetëra diplomatë rusë si reagim për sulmin me armë kimike ndaj ish agjentit rus Sergei Skripal në Salisbury, ku u lëndua rëndë edhe vajza e tij Julia.
/tesheshi.com/
