Përdorimi i një baze ajrore iraniane nga avionët rusë për të bombarduar mbi Siri nuk shkel rezolutën 2231, që ndalon furnizimin e Iranit me avionë ushtarakë. Kjo është ajo çka deklarohet nga autoritetet ruse.
Siç ka raportuar agjencia ruse e lajmeve TASS, ministri i Jashtëm rus, Sergei Lavrov, ka thënë sot se, “Nuk ka patur furnizim, shitje apo transferim të avionëve luftarakë në Iran.”
Ai i është përgjigjur në këtë mënyrë komenteve të zëdhënësit të Departamentit Amerikan të Shtetit, Mark Toner, i cili u shpreh të martën se Rusia mund të ketë shkelur rezolutën 2231 të Këshillit të Sigurimit të OKB-së me përdorimin e territorit iranian për sulme ajrore mbi Siri.
Kjo rezolutë e ndalon furnizimin, shitjen apo transferimin e avionëve luftarakë në Iran nëse nuk ka më parë një miratim nga Këshilli i Sigurimit i OKB-së.
Avionët luftarakë rusë e përdorën të martën për herë të parë bazën ajrore në Hamedan të Iranit për sulme ajrore mbi hapësirën siriane. /tesheshi.com/
