Një shtetas kolumbian në Moskë u arrestua me akuzën e “përhapjes së informacionit të rremë” për forcat e armatosura ruse në mediat sociale, në një nga rastet e para të njohura të një shtetasi të huaj që përballet me ndjekje të mundshme sipas ligjit të ri të “lajmeve të rreme” të Rusisë.
Giraldo Saray Alberto Enriqu, 40 vjeç, është akuzuar për “përhapje publike të informacionit të rremë me vetëdije për forcat e armatosura ruse”.
Nëse shpallet fajtor, ai përballet me një gjobë deri në pesë milionë rubla (46,000 euro) dhe deri në 10 vjet burg, njoftoi agjencia shtetërore ruse e lajmeve Tass.
Ai akuzohet se ka përhapur informacione të rreme me ndihmën e bashkëpunëtorëve të cilët gjithashtu po identifikohen, tha Tass, duke iu referuar burimeve të zbatimit të ligjit, por pa ofruar detaje rreth asaj që ishte shkruar, shkruan The Guardian.
Parlamenti rus miratoi një ligj muajin e kaluar që vendos një dënim me burg deri në 15 vjet për përhapjen e qëllimshme të lajmeve “të rreme” për ushtrinë. Sipas ligjit të ri, lajmet “fake” mund të përfshijnë çdo përmendje të forcave ruse që dëmtojnë civilët ose pësojnë viktima në fushën e betejës. /tesheshi.com/
