Nga Blendi Gashi
Krerët e drejtësisë kosovare, kryeprokurorin Aleksandër Lumezi e kryesuesin e Këshillit Gjyqësorë, Nehat Idrizi, i ka penguar prezenca e mediave në takimin e mbajtur të enjten me kryetarë të gjykatave dhe kryeprokurorë të prokurorive ku është diskutuar për rastet e nivelit të lartë të korrupsionit ku janë të përfshirë njerëz të politikës dhe institucioneve të vendit, si kusht për liberalizimin e vizave, me arsyen se po trajtohen çështje të ndjeshme.
Por të njëjtit çuditërisht nuk i ka penguar pjesëmarrja në takim e ministrit të Drejtësisë, Abelard Tahiri që vjen nga PDK, kur diskutohen rastet e tilla ku janë të përfshirë njerëz të politikës dhe institucioneve të vendit, duke thënë se nuk është diskutuar për emra të përveçëm, por vetëm për numrin e rasteve.
Por pjesëmarrja e ministrit Tahiri në këtë takim të mbyllur dhe pa prezencë të mediave, nga opozitarë dhe përfaqësues të organizatave joqevetare po shihet si një ndërhyrje direkte në sistemin e drejtësisë dhe pengim direkt në luftën anti-korrupsion.
Deputetja e Vetëvendosjes, Albulena Haxhiu, thotë se prezenca e Ministrit të Drejtësisë, në punën e insistiticioneve të drejtësisë, është e papranueshme dhe cenim i drejtpërdrejtë dhe i hapur edhe e asaj pak pavarësie që ka ky sismtem.
“Një Ministër që keqpërdorë Ministrinë e Drejtësisë për të ndërhyrë në sistem dhe një ministër si Abelard Tahiri, vetëm sa e pengon edhe më shumë punën e prokurorive dhe gjykatave. Siç kemi kuptuar, në këtë takim janë përmendur emra të përveçëm që janë duke u gjykuar për raste korruptive. Abelard Tahiri, vetëm sa do të bëj dëme dhe do të krijojë probleme në luftën ndaj krimit të organizuar dhe korrupsionit. Poashtu, ne shprehim shqetësimet tona në raport me qasjen e Këshillit Gjyqësor të Kosovës dhe Këshillit Prokurorial”, thotë Haxhiu.
Sipas saj lejimi i prezencës së Ministrit të Drejtësisë, në takime ku diskutohen çështje të ndjeshme, përbën vepër penale.
“Sipas Nenit 400 të Kodit Penal, “Shkelja e fshehtësisë së procedurës”
1. Kushdo që pa autorizim zbulon informata për të cilat është njoftuar në procedurën zyrtare, që sipas ligjit nuk mund të zbulohen apo ato informata janë shpallur si fshehtësi me vendim të gjykatës apo të organit kompetent, dënohet me gjobë ose me burgim deri në një (1) vit.
2. Kushdo që pa autorizim zbulon të dhëna për identitetin apo të dhënat personale të personit të mbrojtur në procedurë penale apo në programin e veçantë të mbrojtjes, dënohet me burgim deri në tre (3) vjet”, thotë Haxhiu, ndërsa ju bën thirrje institucioneve të drejtësisë, të respektojnë obligimet e tyre kushtetuese dhe ligjore.
Gëzim Shala nga Instituti i Kosovës për Drejtësi (IKD), thotë se pjesëmarrja e ministrit Tahiri në takimin në fjalë përbën një ndërhyrje të pastër politike në sistemin e drejtësisë në njërën anë, dhe në anën tjetër një nënshtrim të këtij sistemi karshi politikës.
“Nga rastet e shënjestëruara, disa nga to janë ende në fazën e hetimeve. Në këto raste ka dëshmi, prova, flitet për sekuestrim dhe konfiskim të dobisë pasurore të fituar në mënyrë të kundërligjshme, e shumë të dhëna të tjera super konfidenciale të cilat nuk duhet ti dijë askush tjetër pos akterëve të sistemit të drejtësisë. Në një shtet normal, nga kjo mbledhje nuk do të dilej me rekomandime por me aktakuzë, pasi në bazë të Kodit Penal të Republikës së Kosovës zbulimi i fshehtësisë zyrtare paraqet vepër penale, qoftë edhe nëse kjo vepër të jetë kryer nga pakujdesia. Për këtë arsye, pjesëmarrja e Ministrit të Drejtësisë në këtë takim në asnjë formë nuk është e pranueshme dhe e njëjta paraqet ndërhyrje në sistemin e drejtësisë”, thotë Shala për tesheshi.com.
Kujtojmë se nga ky ky takim janë nxjerrë gjashtë rekomandime të cilat, sipas krerëve të Këshillit Gjyqësorë, do ta bëjnë me efikase luftën ndaj krimit të organizuar dhe korrupsionit te rastet që janë parakusht për liberalizimin e vizave. /tesheshi.com/
