Partia Demokratike dhe LSI prej disa javësh kanë ngritur akuza ndaj qeverisë mbi mosfunksionimin e radarëve, që monitorojnë hapësirën detare. Debati lindi pas një letre që Drejtori i Përgjithshëm i Policisë së Shtetit, Haki Çako, i drejtoi ish-ministrit të Brendshëm, Dritan Demiraj, ku e informonte se aksionet e policisë kundër trafikimit të kanabisit dështonin pasi radarët nuk punonin.
Radarët që monitorojnë hapësirën detare janë nën varësinë e Ministrisë së Mbrojtjes, e cila ka përgënjeshtruar pretendimet e Çakos, por edhe akuzat e opozitës.
Së fundmi mbi situatën ka reaguar ish-ministrja e Mbrojtjes, Mimi Kodheli. Përmes një komenti në rrjetet sociale, ajo shkruan se të vërtetën e madhe do e zbulojë ligji i vetingut dhe se sipas saj në vitin 2013 kur e majta erdhi në pushtet asnjë nga radarët në det nuk punonte.
“Vetingu është përgjigja ime për deputetin Salih.
Vetingu për ata prokurorë e gjyqtarë që nuk kanë marrë përsipër të investigojnë e gjykojnë kush e la vendin me gatishmëri zero, zero absolute, për shkak të errësirës që kishte lënë në det.
As edhe një prej radarëve nuk punonte kur ne erdhëm në qeverisje në shtator 2013. Zero!
Nga ana tjetër zero, madje borxh, sasia e karburantit në serbatorët e anijeve patrulluese. E sa e sa zero të tjera Salih.
Kam folur pak aso kohe pasi flitej për sigurinë e vendit dhe tema ishte sensitive.
Por sado të flas sdo të jetë asnjëherë mjaftueshëm për të treguar se në çfarë derexheje e kishe lënë vendin, pale sigurinë pastaj.
Sistemi punon megjithë problemet e tua Salih. E rindeza dhe e mirëmbajta.
Ndërkaq ti Salih nxjerr kontrollet që kam aprovuar unë dhe gjetjet e kontrolleve të mia mi faturon po mua.
E bukur kjo!
Derexheja ku le vendin të bëri të marrësh qindra mijra shuplaka qytetarësh në 2013, more qindra mijëra të tilla edhe para pak muajsh.
Vazhdo kështu se do marrësh edhe të tjera. Deri në fund!”, shkruan Kodheli, duke i rikthyer përgjigje vetëm akuzave të ish-kryeministrit, Sali Berisha. /tesheshi.com/
