Kosova, sipas të gjitha gjasave edhe këtë vit do të mbetet pa ushtri të saj. Fajtori kryesor sipas qeverisë mbetet politika dhe mosmarrëveshjet me subjektin politik, Lista Serbe që përfaqëson komunitetin serb në Kosovë.
Pas presidentit Hashim Thaçi që ditë më parë fajësoi “Srpska-n”, një gjë të tillë së fundmi e ka bërë edhe vet ministri i Forcës së Sigurisë së Kosovës, Haki Demolli, i cili në një prononcim për Radion Evropa e Lirë tha se FSK-ja ka realizuar gjithë programin e saj dhe është e gatshme për transformim të mëtejmë, por që një proces i tillë po pengohet nga 11 deputetët serbë.
“Ne jemi të gatshëm, por jemi në pritje të vendimmarrjes politike. Ajo çka tanimë është e ditur është se deputetët e komunitetit serb, të cilët janë në Kuvendin e Kosovës, nuk kanë shprehur ende gatishmërinë e tyre, por mendoj që me zhvillimet politike dhe me bashkë bisedimet, respektivisht me qasjen pro-aktive ndaj tyre, ne do ta kemi edhe votën e tyre”, thotë Demolli.
Por, siç mund të shihet në këtë deklaratë, ministri Demolli nuk ka thënë asgjë të re, pasi dihet botërisht se Lista Serbe ka kohë që ka shprehur qëndrimin e saj për ushtrinë e Kosovës.
Se çështja e transformimit të FSK-së në FAK është një temë për momentin jo relevante për deputetët serbë, e thotë edhe deputeti Nenad Rashiq.
Ai thotë se pas asaj që ka ndodhur me “Trepçën”, në këtë moment nuk ekziston ‘hapësirë manovruese brenda koalicionit dhe marrëveshjes për koalicion’, për çfarëdo bisedimesh për Forcat e Armatosura të Kosovës.
Dorëzimi i qeverisë “Mustafa”, për çështjen në fjalë, padyshim se është dështimi më i madh i kësaj qeverie deri më tani, pra mosthemelimi i ushtrisë së Kosovës, i proklamuar që nga qeveria “Thaçi 2”, por që mbetet një premtim i parealizuar. /tesheshi.com/
