Nga Ahmet Zani
Prena Molla, një grua 62-vjeçare nga fshati i vogël Sukth në Krujë, është nga ata fate njerëzore që të rrënqethin me dramën që kanë përjetuar prej sa janë gjallë, e që vijojnë ta përjetojnë. Një jetë të tërë ajo ka jetuar në ambientet e godinës së pompave të fshatit. Por nuk është vetëm kjo.
Pas humbjes së bashkëshortit shumë kohë më parë, prej 20 vitesh ajo nuk ka kontaktuar vajzën e saj, Mimoza e cila në prill të 1997 është rrëmbyer dhe trafikuar jashtë kufinjve të vendit. Ka dhe dy djem, por njërin në burg, duke jetuar me tjetrin.
Ka ndodhur vërtet diçka e gëzueshme në jetën e saj, dhe e rrallë sigurisht, një strehëz pak më ndryshe që ia ka mundësuar kreu i Bashkisë së Krujës, Artur Bushi, por gjithsesi kjo është shumë pak me brengat e saj të pasosura. Më kryesorja, ajo që e gërryen, është vajza e rrëmbyer për të cilën është tretur e po tretet.
Prena tregon se atë e rrëmbyen në vitin 97, kur akoma nuk i kishte mbushur të 17-tat, dhe kjo ka ndodhur afër një dyqani buke. Prena e kishte dërguar të bijën pikërisht për të blerë bukë, por që nuk u kthye më. Sipas saj, disa nga banorët e kanë parë vajzën duke u rrëmbyer, por nuk kanë mundur të hapnin gojën, nga rreziku që u kanosej prej rrëmbyesve në atë kohë të trazuar ku ligjin e bënin bandat. Më kot Prena priti rikthimin e vajzës së saj, ndërsa dy vëllezërit ishin shumë të vegjël dhe nuk kishin asnjë mundësi të përplaseshin me pushetin e rrëmbyesve dhe as të kërkonin drejtësi.
Pas disa vitesh, Prena ka patur një komunikim me të bijën, Mimozën, vetëm nëpërmjet telefonit, e ku i ka thënë se nuk kthehej dot pranë familjes, siç tregon 62-vjeçarja me lot në sy.
Hallet iu shtuan asaj pesë muaj më parë pas arrestimit të Idrizit, djalit të dytë, të cilin, një banor i fshatit fqinj e ka akuzuar për vjedhjen e banesës. Por banorët të thonë se asnjëri nga djemtë nuk kanë shfaqur të tilla probleme, dhe se mundësia më e madhe është që Idrizi është friksësuar nga prania policore duke pranuar çdo akuze. Ata nuk besojnë që fëmijët e Prenës, edhe pse në varfëri të skajshme, të shkojnë e vjedhin.
Madje të dy djemtë, si Fatmiri ashtu dhe Idrizi kanë zhvillim të vonuar, janë të paarsimuar, saqë Fatmiri nuk arrin të tregojë as moshën e tij të vërtetë, ndërsa të sqaron për ngjarjen e të vëllait, duke komentuar se po nuk pate para nuk del nga burgu. Dhe për të, Idrizi do të mbetet tërë jetën në burg nga mungesa e të ardhurave.
Ndaj, banorët apelojnë në lirimin e Idrizit duke e konsideruar si të pafajshëm.
Prena Molla pra pret të vendoset në banesën e re, por tjetër gjë do dëshironte më shumë, që shteti t’i bënte të mundur kthimin e vajzës së zhdukur 20 vite më parë, e në mund dhe lirimin e Idrizit. /tesheshi.com/
