Ka befasuar një deklaratë e ish–arkëtarit të Lidhjes Demokratike të Kosovës, Emrush Çeku, njeriu që ka menaxhuar milionat e fondit të njohur si “trepërdindëshi”, kur ka deklaruar se UÇK-ja u themelua nga LDK-ja. Pra, një forcë ushtarake, është themeluar pikërisht nga një parti që frymën paqësore në reagimin ndaj regjimit serb e ka patur kredo të saj, pikërisht për faktin e drejtimit nga ish-presidenti Rugova, i njohur si pacifist, që për këtë arsye thirrej dhe “Gandi” i Ballkanit.
I ftuar në emisionin “Info – Box” të RTV Dukagjini, duke treguar një fotografi të vitit 1991, me Adem Jasharin, Çeku tha se “themeluese e bërthamave të para të UÇK-së janë LDK e Gjermanisë dhe Zvicrës.”
Si për ta përforcuar këtë pohim, Çeku publikoi një dokument, në të cilin nënvizohej se afro 20 mijë marka nga fondi i “trepërqindëshit” të degës së LDK-së në Gjermani, i ishin dhënë Adem Jasharit.
Në kohën e daljes së UÇK-së, LDK-ja e Rugovës u konsiderua si parti “jashtë kohe”, pikërisht nga fakti se paraqiste një lloj pacifizmi të paarsyeshëm në raport me situatën që i thërriste shqiptarët nën armë. Ndërsa Adem Jashari e Ibrahim Rugova, pavarësisht kauzës së njëjtë, shiheshin si të kundërt në strategji e veprime. /tesheshi.com/
