Duket e pabesueshme por është e vërtetë: për konfliktin Hamas-Izrael ftohet të flasë dhe Stavri Marko. Gazetari himariot që mbron kauzat helenike të Athinës në jugun shqiptar, i cili nuk njihet për gjë tjetër pos këtij misioni, nga Euronews Albania ftohet të flasë për një ndër çështjet më të koklavitura të botës, të historisë dhe të tashmes, për të cilën duhet të kesh një tagër të caktuar për të folur; fjala vjen, ia ke kushtuar një pjesë të jetës a karrierës njohjes së thellë të çështjes, me lexime, studime e hulumtime, e më e pakta ke shkelur njëherë në ato toka. Nuk dihet se ku përfshihet këtu Stavri Marko, i cili si shumë gazetarë të tjerë apo të ashtuquajtur analistë, nuk ka modestinë t’i thotë “jo” ftesave nga redaksi lajmesh për çështje ku nuk gëzojnë kompetencën minimale.
Dhe më të tmerrshme se qëndrimet politike dhe shtetërore karshi një konflikti ku testohet si morali e si njohja, është profanizmi gazetaresk që shpërfaqet me gjithë përmasën e tij të frikshme, jo thjesht nga qëndrimet amorale, me një diferencim ulëritës racor mes njërës palë dhe tjetrës, por dhe nga qasjet pa thelb duke zgjedhur të ftojnë në studio injorantë të hatashëm lidhur me çështjen, delirantë me theks provincial që “prishen” nga dalja në televizor si analistë. /tesheshi.com/
