Është për t’u përshëndetur por dhe jo, kurajoja e Lulzim Bashës për të bërë divorc nga Berisha, për t’u shkëputur nga njeriu që, aq sa investoi për të po aq dhe ia zhvoshi çdo cdo grimcë personaliteti, për aq sa kishte, duke e lënë një qenie pa identitet, një lloj kukulle hiç simpatike politike, deri të neveritshme. Patjetwr dhe mediokre.
Tani, kjo ndarje, është prova për Bashën nëse ka diçka vërtet diçka të tijën që Berisha nuk ia la të shfaqte apo jo. Shenjat janë që jo. Dhe, kush ka tentuar të merret me aspekte të personalitetit të Bashës, apo të identitetit të tij të diskutueshëm, nuk ka cekur thelbin e tij; ai është me defekt që në lindje, pikërisht me defekte identiteti, personaliteti. Ai ka bërë shkollë në Perëndim, ndërkohë që treguesit e tij skolastikë në ligjërim dhe politikëbërje janë pothuajse zero. Ai ka bërë para, por ka një mungesë dramatike talenti për të bërë politikë, aq më pak për të qeverisur. Pra, ca resurse që ia ka dhënë jeta duket se kanë qenë aksidentale në raport me një boshësi identitare që ai, duhet theksuar, e ka qe në lindje, si e metë kjo, deri më tani e pashërueshme. Së paku aty e ku e njeh publiku, në politikë.
Dhe, në këtë zhvillim të ethshëm ku ndodhet, duhet theksuar një detaj thelbësor: atë që ndarjen nga Berisha nuk e ka çështje morali, çështje ndërgjegjeje, vetëdijësimi, por e ka një imponim amerikan.
Kjo do të thotë se të gjitha cilësimet e tij ndaj Berishës janë një hipokrizi e gjallë. Vlen kjo për të gjithë skotën e tij, ushqyes ndër vite berishizmi, si dhe të ushqyer prej tij. Sepse a nuk kanë qenë këta që në vite i kanë shërbyer verbërisht atij, në çdo marrëzi, edhe pse mund ta kenë patur të qartë se me ç’delikuent politik kanë patur të bëjnë. Tashmë, atë që kanë ushqyer e me të cilën janë ushqyer, po iu përplaset atyre në trajtë stërkalash, pra nga Berisha.
Nëse nuk do kish qenë “non grata”, pra faktori amerikan me imponimin e tij, nuk do kishte kurrë gjasë që ta bënin atë që bëjnë sot, Basha & Co, në emër të ndërgjegjes.
Pra, nuk kemi të bëjmë me ndonjë moral të ri joshës politik. Të dy kahjet janë të sëmura dhe kjo është drama më e madhe e PD-së, shumë më tepër se ndarja e saj. /tesheshi.com/
