Shtatë vjet më parë, 200,000 dollarë para në dorë dhe 400,000 dollarë çeqe u vodhën nga kasaforta e Kishës Lakewood, një megakishë në Hjuston, e drejtuar nga ungjilltari i njohur televiziv Joel Osteen.
Muajin e kaluar, më 10 nëntor, paratë u zbuluan – jo nga detektivët apo stafi i kishës – por nga një hidraulik i cili u thirr për të riparuar tualetin e kishës.
“Ne hoqëm pllakën dhe filluam të bëjmë të njëjtën gjë me tualetin dhe kur hoqa izolimin, rreth 500 zarfe ranë nga muri. Kontaktova menjëherë me mbikëqyrësin e mirëmbajtjes dhe më pas ia dorëzova zarfet në kishë”, tha hidrauliku Justin në emisionin e mëngjesit “The Morning Bullpen me George Mo dhe Erik”.
Policia e Hjustonit konfirmoi të premten se zbulimi lidhej me vjedhjen e vitit 2014. Meqenëse paratë u gjetën në pronën e Lakewood, ato u renditën dhe u dokumentuan dhe iu lanë kishës, tha policia, duke shtuar se hetimi vazhdon.
Vjedhja e kasafortës së kishës në vitin 2014 u zbulua nga një punonjës i saj. Kisha Lakewood tha në atë kohë se fondet ishin siguruar plotësisht.
“Ne po punojmë me kompaninë tonë të sigurimeve për t’i kthyer fondet e vjedhura në kishë”, thanë ata. Kisha dhe organizata jofitimprurëse Crime Stoppers of Houston ofruan 25,000 dollarë për informacion që do të çonte në arrestimin e atyre që ishin përgjegjës për vjedhjen.
“Unë duhet të përfitoja diçka,” tha hidrauliku duke qeshur.
“Duke lënë mënjanë shakanë, në asnjë moment nuk më ka shkuar në mendje të fus ndonjë nga zarfet në xhep, jam njeri i ndershëm”, përfundoi ai.
“Ishte pa dyshim telefonata më unike dhe e mahnitshme që kam pasur në karrierën time radiofonike 25-vjeçare. Në mes të emisionit, ne shkuam në një pauzë reklame për të konfirmuar se dëgjuesi nuk po tallej. Ai na tregoi historinë e tij në transmetim.
Besoj se hidrauliku është sigurisht i zhgënjyer sepse askush nga kisha apo policia nuk e kanë kontaktuar që kur ai gjeti paratë më 10 nëntor. Askush nuk i tha faleminderit”, tha prezantuesi i radios George Lindsey. /tesheshi.com/
