Opinion kontradiktor ka dalë së fundmi, nga një sondazh në Shtetet e Bashkuara sipas të cilit shumica e amerikanëve mendojnë se monumentet e Konfederatës duhet të ruhen në vendet publike, pavarësisht se shumë qytete kanë shprehur vendosmërinë e tyre për t’i larguar ato. Sondazhi i fundit të gushtit gjeti se 54 për qind e të rriturve amerikanë thonë se monumentet e Konfederatës duhet të “mbeten në të gjitha vendet publike”, ndërsa 27 për qind e tyre thonë se “ato duhet të hiqen nga të gjitha hapësirat publike”. Një pjesë tjetër prej 19 për qind janë shprehur se nuk kanë një mendim për këtë çështje.
Megjithatë, përgjigjet në sondazh janë ndarë në mënyrë të dukshme e të thellë sipas vijave partiake dhe atyre racore, ndërsa të bardhët dhe republikanët kanë dalë gjerësisht në mbështetje të mbajtjes së monumenteve. Demokratët dhe minoritetet janë dukshëm më të prirur të mbështesin zhvendosjen.
Qytetet anë e mbanë Shteteve të Bashkuara po debatojnë se çfarë duhet bërë me qindra statuja dhe monumente të tjera të Konfederatës që praktikonte skllavërinë. Disa monumente tashmë janë zhvendosur gjatë këtij viti në qytete si New Orleans dhe Baltimora.
Sondazhi gjeti po ashtu se publiku ishte pothuajse i ndarë baraz në lidhje me marshimin fatal “Unite the Right” që u thirr për të protestuar kundër heqjes së një statuje të gjeneralit të Konfederatës, Robert E Lee në Charlottesville, Virxhinia.
Marshimi u organizua nga nacionalistët e bardhë dhe tërhoqi anëtarë të Ku Klus Klanit, neo-nazistë dhe supremacistë të bardhë, sikundër edhe kundër-protestues të krahut të majtë. Tubimi kaloi shpejt në dhunë, ndërsa një grua 32-vjeçare mbeti e vrare pasi një makinë hyri në turmën e kundër-protestuesve.
Personi që sipas policisë ngiste makinën u përshkrua si një ish-mësues që ishte “prekur” nga ideologjia naziste. Por, mes kampeve kishte plot njerëz që mbanin shkopinj e mburoja, gati për konfrontim.
Trump, më pas, fajësoi “të dyja palët” për konfliktin. “Ishte një grup nga njëra anë që ishte mjaft keq”, tha ai. “Dhe kishe një tjetër grup nga ana tjetër që ishte gjithashtu shumë i dhunshëm”.
Komentet e tij u pritën me një kor kritikash në të gjithë spektrin politik, përfshi edhe nga shefat e partisë Republikane dhe liderët e biznesit. Trump më vonë shkriu dy grupe këshillimore presidenciale pasi një numër në rritje anëtarësh të tyre, drejtues ekzekutivë dhanë dorëheqjen në shenjë proteste ndaj komenteve të tij. Po ashtu, edhe të 17 anëtarët e komitetit të Trump për artet dhe humanizmin dhanë dorëheqjen.
Megjithatë, sipas sondazhit, 31 për qind e amerikanëve e përshkruan marshimin si “një përzierje e barabartë” rebelimi dhe kërcënimi nga supremacistët e bardhë dhe kundër-protestuesit e së majtës, një pikëpamje që pak a shumë përputhet me komentet e Trump. 28 për qind të të anketuarve i shohin supremacistët e bardhë si agresorë dhe 10 për qind fajësuan protestuesit e krahut tjetër. 32 përqindëshi i mbetur thanë se nuk dinin ç’të thoshin.
Sondazhi i Reuters/Ipsos u krye online në gjuhën angleze, në të gjithë Shtetet e Bashkuara duke mbledhur përgjigje nga 2 mijë e 149 persona, përfshirë 874 demokratë dhe 763 republikanë. Intervali i intervistimit ka një besueshmëri, sipas përllogaritjeve të sigurisë, prej 2 pikë përqindje për gjithë grupin dhe katër për qind për demokratët dhe republikanët.
Përgatiti: Juli Prifti – /tesheshi.com/
