Nga Mensur Krasniqi
Nuk janë vetëm ta dënuarit e rastit Monstra, familjarët e tyre, por dhe familjarët e viktimave të liqenit të Smillkovës, të cilët presin të zbardhet e vërteta e asaj dorë të pabesë që ua morri jetën në mënyrë makarabre. Shqiptarë nga njëra anë, e maqedonas nga ana tjetër, brenga e tyre është njësoj, pasi të dyja palët e kanë nuhatur që dikush ka luajtur keq me fatin e tyre.
5 të rinj maqedonas u vranë pa asnjë arsye, ndërsa për jetët e tyre të ikura po vuajnë ca shqiptarë, që dhe për familjarët e viktimave, nuk besohet se janë ata që jua morrën jetën evletërve te tyre.
Një muaj pas vrasjes së pesëfishtë policia maqedonase arrestoi me dhjetëra shqiptarë myslimanë si të dyshuar për këtë vrasje. Më pas ky numër i të dyshuarve u reduktua, që në fund 5 shqiptarë të fajësohen se kanë kryer vepër penale të terrorizmit, dhe të dënohen me burg të përjetshëm. Për këtë epilog gjyqësor u revoltuan të gjithë shqiptarët anembanë, përveç autoriteteve qeveritare të BDI-së.
Jo vetëm kaq, të revoltuar dhe të pakënaqur me vendimin gjyqësor për burgim të përjetshëm të shqiptarëve, së fundi u shpreh edhe njëri nga prindërit e pesë të vrarëve maqedonas. Në një intervistë për emisionin “10 minuta” Goran Nakevski, babai i njërit prej viktimave në rastin Monstra, thotë se është ende në kërkim të së vërtetës për vrasjen e djalit të tij. Ai thotë se është i zhgënjyer për vendimin e liderit të opozitës, Zoran Zaev, për të mos i publikuar materialet që i posedon në lidhje me rastin Monstra.
“Ai u betua në emrin e fëmijëve të tij që do të na japë ato materiale, sepse ai nuk mundet t’i shpallë në publik, por si çdo politikan, edhe fjala e tij nuk vlen as 5 para”, tha Goran Nakevski.
Goran Nakevski komentoi edhe deklaratën e Zoran Zaevit të dhënë për gazetën gjermane, ku thotë se persona të pafajshëm vuajnë dënimin për rastin Monstra.
Ka më shumë se 10 ditë që familjet e viktimave të këtij rasti, kërkojnë që të takohen me prokuroren speciale, por ende nuk kanë përgjigje. Sipas Goran Nakevskit, nëse prokurorja nuk trajton rastin Monstra, ajo do të thotë se partitë janë marrë vesh që ky raste të mbyllet me kaq.
“Ne duam që prokurorja speciale ta marrë përsipër këtë rast, mirëpo ne kemi disa informata që të 3 partitë politike janë marrë vesh për këtë rast. Ne kërkojmë edhe nga opinioni publik që të insistojë që prokurorja ta shqyrtojë këtë rast.Të zbardhet rasti, të na pushojnë dhimbjet neve dhe opinionit të gjerë publik në Maqedoni”, shtoi Nakevski.
I pyetur se çka nëse prokurorja speciale nuk e merr përsipër rastin, Nakevski tha se kjo do të jetë provë nëse LSDM, VMRO-DPMNE dhe BDI janë dakorduar që të mos preket rasti i tyre.
Përveç tjerash, Nakevski dyshon se edhe rasti i Kumanovës është inskenuar vetëm për ta mjegulluar rastin e Monstra-s . Ai tregoi edhe mesazhin e marrë nga Zaev, më 1 Maj, ku i premtohet se në një periudhë prej dy javësh do të publikohet gjithçka. Por vetëm 8 ditë pasi ka pranuar mesazhin, ndodhën trazirat në Lagjen e Trimave, që sipas tij e pamundësuan liderin e opozitës t’i publikojë materialet që posedon për rastin Monstra.
Në bazë të ligjit për procedurë penale, çdo person i cili pretendon se posedon dëshmi që lindin dyshimin se dikush është kryerës potencial i veprës penale, ai patjetër duhet të dëshmojë në gjykatë, ndërsa gjitha materialet t’i dorëzojë prokurorit publik, gjë që ende s’po ndodh me Zaevin.
I njëjti me muaj pretendon se ka materiale ku janë përgjuar persona zyrtar të përzier në rastin Monstra, mirëpo deri tani as nuk i ka publikuar opinionit, as nuk i ka dorëzuar organeve kompetente.
Kështu, portali tesheshi.com ka kontaktuar ekspertin për çështje juridike, Agim Nuhiun të shpjegojë procedurën e veprimit të prokurorisë për veprat penale.
“Në të gjitha situatat kur do të këtë indikacione se është konsumuar figura e një vepre penale sigurisht që duhet të hetohet rasti. Kur do të sigurohen faktet e nevojshme që të bëhet ndjekja penale, atëhere padyshim që prokuroria do të duhet ta ushtrojë ndjekjen penale duke e përfaqësuar akuzën në gjyq në emër të shtetit. Në ushtrimin e kompetencave të tyre prokurorët padyshim që duhet t’ju nënshtrohen Kushtetutës dhe ligjeve në fuqi në njërën anë, dhe në anën tjetër duke respektuar parimet e procedimit të drejtë, të barabartë e të rregullt ligjor dhe mbrojtjes të së drejtave, të interesave dhe të lirive të ligjshme të njeriut, pa asnjë dallim apo diferencim nga cila do bazë qoftë”, deklaroi Agim Nuhiu.
Ai në vazhdim theksoi që në asnjë mënyrë nuk do të arsyetohej ndërhyrja e partive politike në përcaktimin e agjendave dhe aktiviteteve zyrtare të prokurorisë. Çdo ndërhyrje politiko-partiake bie ndesh me standardet thelbësore të shtetit të së drejtës dhe sundimit të drejtësisë. /tesheshi.com/
