Fareed Zakaria dha një monolog pasionant në rrjetin televiziv amerikan, CNN të dielën në mbrëmje, ku ai nënvizonte përse nuk do të votojë për Donald Trump më 8 nëntor.
Zakaria nuk e ka mbajtur të fshehtë kundërshtimin e tij ndaj kandidatit presidencial republikan, por në një opinion-editorial për “The Washington Post” dhe shfaqjen e vet televizive “GPS” ai tha se dëshironte të shpjegonte për herë të fundit përse Donald Trump duhet të marrë një vëmendje të veçantë.
“Nuk jam ndonjë person me prirje të lartë konsensuale. Kam pikëpamje që janë të majta ose të qendrës, por që të tjerët mendojnë se janë konservatore”, tha Zakaria. “Unë mendoj se shumë politikanë republikanë, përfshirë edhe kandidatët e fundit të GOP, John McCain dhe Mitt Romney, që të dy burra të respektueshëm, do të kishin qenë presidentë të mirë”, shtoi Zakaria.
Por, veçoi ai, Donald Trump është i ndryshëm.
“Jo thjesht për shkak se është i padurueshëm, ngjitës dhe vulgar apo se marrëveshjet e tij të biznesit tregojnë se ai është një artist i mashtrimit. Ai është i ndryshëm për shkak të asaj që beson”.
Zakaria këmbënguli se pikëpamjet politike për çështjet politike që nga siguria sociale e deri tek taksat janë “të pasinqerta”, dhe thjesht, “reflektime të asaj që ai mendon se mbështetësit e tij duan të dëgjojnë”.
Në vend të kësaj, theksoi ai, votuesit duhet të shqyrtojnë të kaluarën e tij në vend mënyrë që të kuptojnë besimet e tij të vërteta, vlerat dhe instiktet e tij të vërteta.
Duke iu referuar viteve të Trump, si një zhvillues pronash dhe trajtimin që i ka bërë “The Central Park Five,” Zakaria dënoi atë që e quajti histori të Trumpit me “rracizmin”.
“Trump duket se beson thellësisht në stereotipe etnike”, tha Zakaria. E përveç kësaj, shtoi ai, Trump ka “qenë gjithashtu gjithmonë një proteksionist”.
“Fija e përbashkët është se Trump është kaq i shkathët t’u thojë amerikanëve që përballen me vështirësi ekonomike se ata duhet të fajësojnë të huajt për problemet e tyre”, tha Zakaria.
Moderatori i CNN gjithashtu kritikoi sjelljen e Trump ndaj grave.
“Ai ka thënë dhe ka bërë me dhjetëra gjëra përgjatë 30 vjetëve që konfirmojnë pikëpamjen poshtëruese për gratë – që me intervistat me Hoëard Stern, gjatë drejtimit të konkursit të Miss Universe, kur përshkruante gratë që punojnë, e kur debatonte me kandidate femra si Carly Fiorina dhe Hillary Clinton”, tha ai.
Përveç këtyre, Zakaria tha se Trump ka “neveri për shumë themele të demokracisë liberale”, që nga ndalimi i muslimanëve për të hyrë në Amerikë e deri tek kërcënimi për të burgosur kundërshtaren e tij nëse zgjidhet president.
“Donald Trump nuk është një kandidat normal. Ai është një kancer në demokracinë amerikane”, përfundoi Zakaria.
“Dhe kjo është arsyeja përse do të votoj kundër tij të martën”.
Përgatiti: Juli Prifti – /tesheshi.com/
